दिव्यांग,गरोदर महिला शिक्षकांना निवडणूक कामातून वागळणार का?
दिव्यांग, गरोदर आणि बाळाला स्तनपान करवणाऱ्या माता, सेवानिवृत्तीसाठी सहा महिने किंवा त्यापेक्षा कमी कालावधी राहिलेले अधिकारी आणि कर्मचाऱ्यांना निवडणूक कामांमधून वगळणे अपेक्षित असल्याचे पत्रात म्हटले आहे.
eduvarta@gmail.com 
एज्युवार्ता न्यूज नेटवर्क
राज्यात होवू घेतलेल्या विधानसभा निवडणूकीसाठी (Maharashtra Assembly Elections) शिक्षक, शिक्षकेतर कर्मचारी (Teachers, non-teaching staff) आणि अधिकाऱ्यांना हजर राहण्याची पत्रे निवडणूक आयोगाकडून पाठवण्यात आली आहेत. मात्र, विशेष कारणांसाठी काही कर्मचाऱ्यांना या कामकाजातून वगळण्यात यावे (Some employees should be excluded from work), अशी विनंतीवजा मागणी महाराष्ट्र राज्य शिक्षक परिषदेने राज्य निवडणूक आयोगाकडे केला आहे. दिव्यांग, गरोदर आणि बाळाला स्तनपान करवणाऱ्या माता, सेवानिवृत्तीसाठी सहा महिने किंवा त्यापेक्षा कमी कालावधी राहिलेले अधिकारी आणि कर्मचाऱ्यांना निवडणूक कामांमधून वगळणे अपेक्षित असल्याचे पत्रात म्हटले आहे.
महिलांच्या निवासाची व्यवस्था होईपर्यंत त्यांना निवडणुकीचे काम देऊ नये, त्यांना त्यांच्या घराजवळील परिसरातच काम द्यावे, निवडणुकीच्या दुसऱ्या दिवशी या कर्मचाऱ्यांना सुटी द्यावी, अशी विनंती करणारे पत्र शिक्षक परिषदेने राज्य निवडणूक आयोगाला पाठवले आहे. गंभीर वैद्यकीय आजार, मधुमेह आणि हृदयाशी संबंधित आजार असलेल्या कर्मचाऱ्यांना निवडणूक ड्यूटीतून वगळावे, अशी विनंती करण्यात आली आहे.
राज्य निवडणूक आयोगाने शिक्षक, शिक्षकेतर कर्मचारी व अधिकाऱ्यांमधील काही घटकांनाही निवडणूक ड्यूटी लावू नये, असे या अर्जात नमूद करण्यात आले आहे. त्याचबरोबर दिवाळी सुट्टीच्या दिवसांमध्ये आधीच कपात झाली असल्याने दिवाळीच्या सुट्टीत निवडणुकीशी निगडित कोणतेही काम किंवा प्रशिक्षण लावू नये, अशी मागणीही शिक्षक परिषदेने केली आहे. मात्र, त्यावर निवडणूक आयोग कोणता निर्णय घेणार, याकडे आता संबंधितांचे लक्ष लागले आहे.
