CHB प्राध्यापकांची रोजगार संरक्षणाची मागणी; सर्व Verticals चा समावेश करा

एज्युवार्ता न्यूज नेटवर्क 

राज्यातील विद्यापीठे व संलग्न महाविद्यालयांमध्ये राष्ट्रीय शैक्षणिक धोरण (NEP 2020) अंतर्गत नव्या अभ्यासक्रम रचनेची अंमलबजावणी सुरू असताना कार्यभार मोजणीमध्ये अभ्यासक्रमातील सर्व Verticals चा समावेश करण्यात यावा, अशी प्रमुख मागणी अखिल भारतीय शैक्षिक महासंघ आणि महाराष्ट्र राज्य नेट-सेट व पीएच.डी. धारक संघर्ष समितीने केली आहे. यासंदर्भात संघर्ष समितीच्या पदाधिकाऱ्यांनी पुणे विभागाचे सहसंचालक डॉ. अशोक उबाळे यांची भेट घेऊन सविस्तर चर्चा केली व निवेदन देण्यात आले. 

 राष्ट्रीय शैक्षणिक धोरण 2020 अंतर्गत पदवी व पदव्युत्तर स्तरावर विविध Verticals अभ्यासक्रमात अनिवार्य स्वरूपात समाविष्ट करण्यात आले आहेत. मात्र, विविध सहसंचालक कार्यालयांकडून महाविद्यालयांचा अध्यापन कार्यभार निश्चित करताना या Verticals चा कार्यभार ग्राह्य धरला जात नसल्याचे निदर्शनास आले आहे. ही बाब NEP 2020 च्या मूलभूत उद्दिष्टांशी विसंगत असून त्यामुळे महाविद्यालयीन प्रशासन, शिक्षक आणि विद्यार्थ्यांसमोर शैक्षणिक तसेच प्रशासकीय अडचणी निर्माण होत असल्याचा दावा संघटनांनी केला.

 शैक्षणिक वर्ष 2025-26 मध्ये अनुज्ञेय करण्यात आलेल्या तासिका तत्त्वावरील (CHB) पदांच्या ना हरकत प्रमाणपत्रांना (NOC) शैक्षणिक वर्ष 2026-27 मध्येही कायम ठेवण्याची मागणी केली. तसेच NEP 2020 अंतर्गत कार्यभार मोजणीसाठी स्पष्ट शासन निर्णय तातडीने जारी करावा, अशीही मागणी करण्यात आली.

राज्याच्या उच्च शिक्षण विभागाकडून तासिका तत्त्वावरील प्राध्यापकांच्या जागांमध्ये कपात करण्यात आल्याने हजारो CHB प्राध्यापकांवर उपासमारीची वेळ आली असून त्यांच्या रोजगारावर गंभीर परिणाम होत असल्याचे पदाधिकाऱ्यांनी यावेळी निदर्शनास आणून दिले. कार्यभार मोजणीतील त्रुटी दूर करून CHB प्राध्यापकांच्या रोजगाराचे संरक्षण करण्यासाठी शासनाने तातडीने हस्तक्षेप करावा, अशी मागणी बैठकीत उपस्थित प्राध्यापकांनी केली.

या बैठकीस अखिल भारतीय शैक्षिक महासंघाचे (ABRSM)सावित्रीबाई फुले पुणे विद्यापीठ संघाचे अध्यक्ष डॉ. डी. बी. पवार, महासंघाचे माजी अध्यक्ष डॉ. ए. पी. कुलकर्णी, डॉ. दीपक सुरवसे, डॉ. अजिनाथ डोके, डॉ. अमोल कवडे, डॉ. देवानंद गोरडवार, डॉ. सुरेश शिंदे, डॉ. गणेश पांढरे, डॉ. सुग्रीव अडाळ, डॉ. संदीप इरोळे, डॉ. सचिन पवार, डॉ. ज्ञानेश्वर वराट, डॉ. राहुल गंडे, डॉ. हनुमंत शिंदे, डॉ. सोमनाथ गुणवरे, डॉ. आनंद कोरे यांच्यासह पुणे जिल्हा परिसरातील मोठ्या संख्येने CHB प्राध्यापक उपस्थित होते.