प्राध्यापक भरतीसाठी 10 टक्के मराठा आरक्षण लागू ; भरती प्रक्रियेत पुन्हा बदल 

राहुल शिंदे 

एज्युवार्ता न्यूज नेटवर्क 

सावित्रीबाई फुले पुणे विद्यापीठातील (Savitribai Phule Pune University) विविध विभागांमधील 111 शिक्षकीय (प्राध्यापक) पदाच्या भरतीसाठी (Recruitment of 111 Vacancies of Professors)राबवल्या जाणाऱ्या प्रक्रियेत पुन्हा एकदा बदल करावा लागणार आहे.राज्य शासनाने 26 फेब्रुवारी 2024 रोजी जाहीर केलेल्या 10 टक्के मराठा आरक्षणाचा (Maratha reservation)समावेश करून आता विद्यापीठातील रिक्त जागांची प्राध्यापक भरती प्रक्रिया (Recruitment process)राबवली जाणार आहे.त्यामुळे या आरक्षणाचा लाभ घेऊ इच्छिणाऱ्या उमेदवारांना ऑनलाईन अर्जात बदल करण्याची संधी विद्यापीठातर्फे देण्यात येणार असल्याचे विश्वसनीय सूत्रांकडून सांगितले जात आहे.

पुणे विद्यापीठातील 111 प्राध्यापक पदाच्या भरतीसाठी विद्यापीठ प्रशासनाने 16 फेब्रुवारीपर्यंत ऑनलाईन अर्ज स्वीकारले आहेत. तर 29 फेब्रुवारीपर्यंत अर्जाची हार्ड कॉपी जमा करून घेतली आहे.विद्यापीठाकडे एकूण 5 हजार 501 उमेदवारांचे अर्ज जमा झाले आहेत.मात्र,दिव्यांग आरक्षणामुळे विद्यापीठाला भरती प्रक्रियेत काही बदल करावे लागले होते.त्यानंतर आता मराठा आरक्षणाच्या अंमलबजावणीसाठी पुन्हा एकदा बदल करावे लागणार आहेत.राज्य शासनाने 26 फेब्रुवारी 2024 रोजी प्रसिध्द केलेल्या अध्यदेशात सरळसेवा भरतीमधील निवड प्रक्रिया सुरू झाली असेल तर अशा प्रकरणात या अद्यायदेशाच्या तरतुदी लागू होणार नाहीत,असे स्पष्टपणे नमूद करण्यात आले आहे.

हेही वाचा : शिक्षण विद्यापीठाच्या अधिष्ठाता पदाचा अतिरिक्त कार्यभार कोणाकडे ? काय झाले नवे बदल...

विद्यापीठाच्या प्राध्यापक भरतीसाठी सध्या स्थितीत केवळ अर्ज जमा करण्याची प्रक्रिया पूर्ण झाली आहे.तसेच  अध्यादेशात उल्लेख केलेल्या 2024 चा महाराष्ट्र अधिनियम क्रमांक 16 मधील कलम 18 (1) चा उल्लेख करण्यात आला आहे.त्यानुसार केवळ लेखी चाचणीच्या किंवा मुळाखातीच्या आधारे भरती करावयाची असेल आणि अशी लेखी चाचणी किंवा मुलाखत सुरू झाली असेल तर हा अध्यादेश लागू होणार नाही. मात्र,विद्यापीठाची मुलाखतीची प्रक्रिया अद्याप सुरू झालली नाही. त्यामुळे विद्यापीठाला या अध्यादेशाची अंमलबजावणी करावी लागणार आहे.या संदर्भातील सविस्तर माहिती राजपत्रात देण्यात आली आहे,असेही सूत्रांनी सांगितले. 

विद्यापीठातील प्राध्यापक भरतीसाठी मोठी स्पर्धा पाहायला मिळणार आहे.एकट्या केमेस्ट्री विभातील जागांसाठी 1 हजार 38 अर्ज आले आहेत. त्याचाप्रमाणे अँथ्रोलॉजी - 44 ,बायोलॉजी - 170, बॉटनी -265, सेंटर फॉर परफॉर्मिंग आर्ट - 42 ,सेंटर ऑफ ऍडव्हान्स स्टडीज अँड संस्कृत  -46 ,कम्युनिकेशन अँड जर्नलिझम -126 , डिफेन्स आणि स्टार्टरजी स्टडीज -54, डिपार्टमेंट ऑफ हेल्थ सायन्स - 5 ,डिपार्टमेंट ऑफ पाली  -55,  डिपार्टमेंट ऑफ पॉलिटिकल अँड सायन्स - 246 ,डिपार्टमेंट ऑफ वुमन अँड जेंडर स्टडीज -11, इकॉनॉमिक्स -51, एज्युकेशन -25, इंग्लिश - 108, इन्व्हाईटमेंट सायन्स -13, फॉरेन लॅंग्वेज -80 , हिंदी -19, इन्स्ट्रुमेंटेशन सायन्स -14 ,लॉ - 76 ,लायब्ररी अँड इन्फॉर्मेशन सायन्स -131 ,मराठी - 371 ,मॅथेमॅटिक्स 206, मीडिया अँड कम्युनिकेशन स्टडीज -206, मायक्रोबायोलॉजी -98 ,फिलॉसॉफी - 67 ,फिजिक्स - 764 ,सायकॉलॉजी -103 ,सोशियोलॉजी - 141, स्टॅटिस्टिक्स -135,  झूलॉजीसाठी 523 अर्ज आले आहेत.आरक्षणाचा लाभ दिला जाणार असल्याने अनेक उमेदवारांचा फायदा होणार आहे.