रोहित पवार पुन्हा आक्रमक; २६ सप्टेंबरपासून पुण्यात विद्यार्थ्यांसोबत आंदोलन, MPSC अध्यक्षांच्या राजीनाम्याची ठाम मागणी
MPSC परीक्षार्थींनी २६ सप्टेंबरपासून पुण्यात पुन्हा एकदा आंदोलन करण्याचे नियोजन केले आहे. रोहित पवार यांनी या आंदोलनाला पाठिंबा जाहीर केला असून, परीक्षा आणि भरतीबाबत काही मागण्याही मांडल्या आहेत.
Eduvarta
एज्युवार्ता न्यूज नेटवर्क
महाराष्ट्र लोकसेवा आयोगाच्या परीक्षांमधील कथित पेपरफुटी, परीक्षा प्रक्रियेतील अनियमितता आणि रखडलेल्या भरतीमुळे विद्यार्थ्यांचा आक्रोश पुन्हा वाढला आहे. राष्ट्रवादी काँग्रेस शरद पवार पक्षाचे आमदार रोहित पवार यांनी एमपीएससीचे अध्यक्ष विवेक भीमनवार यांच्या राजीनाम्याची मागणी पुन्हा एकदा लावून धरली आहे. या मागणीसाठी २६ सप्टेंबरपासून पुण्यात विद्यार्थ्यांसोबत आंदोलन करणार असल्याची घोषणा त्यांनी केली आहे. लाखो विद्यार्थ्यांच्या भविष्याशी संबंधित या मुद्द्यावर ते आक्रमक भूमिका घेत आहेत.
रोहित पवार यांनी सोशल मीडियाद्वारे आपली भूमिका स्पष्ट केली. विद्यार्थ्यांच्या आंदोलनानंतरही अध्यक्षांच्या राजीनाम्याबाबत अद्याप कोणताही निर्णय झालेला नसल्याचा दावा त्यांनी केला. ७ सप्टेंबर रोजी पुण्यात विद्यार्थ्यांचा भव्य आक्रोश मोर्चा झाला होता. त्यावेळीही एमपीएससी अध्यक्षांच्या राजीनाम्याची प्रमुख मागणी करण्यात आली होती. आता गणेशोत्सवानंतर पुन्हा आंदोलनाची तयारी सुरू झाली आहे.
२६ सप्टेंबरपासून पुण्यात विद्यार्थ्यांसमवेत स्वतः आंदोलनाला बसणार असल्याचे रोहित पवार यांनी जाहीर केले. एमपीएससी अध्यक्षांचा राजीनामा घ्यावा आणि त्यांच्या जागी विद्यार्थ्यांना विश्वासात घेऊन स्वच्छ प्रतिमेचा अध्यक्ष नियुक्त करावा, अशी ठाम मागणी त्यांनी केली आहे. याबाबत पुणे पोलीस आयुक्तांना पत्राद्वारे कळवण्यात आल्याचेही त्यांनी सांगितले.
त्यांच्या एक्स पोस्टमध्ये रोहित पवार म्हणाले की, लाखो विद्यार्थ्यांच्या भविष्याची राख करणाऱ्या भ्रष्ट अध्यक्षांच्या राजीनाम्यासाठी राज्यभरात मोठे मोर्चे झाले, पण अद्याप राजीनामा झालेला नाही. ७ सप्टेंबरच्या मोर्चानंतर पुन्हा आंदोलनाची घोषणा विद्यार्थ्यांनी केली होती. त्यानुसार आता ते स्वतः आंदोलनात सहभागी होणार आहेत. भ्रष्ट अध्यक्षांचा राजीनामा, दिलेल्या शब्दाप्रमाणे २०२६ मध्ये ७० हजारांची मेगाभरती तत्काळ सुरू करणे आणि राजस्थानप्रमाणे १०० रुपयांच्या कार्डवर वर्षभर परीक्षा घेणे या तीन प्रमुख मागण्या त्यांनी मांडल्या.
विद्यार्थ्यांच्या आंदोलनाला पोलिसांनी सहकार्य करावे आणि नोटिसा द्यायच्या असतील तर विद्यार्थ्यांना त्रास न देता स्वतःला नोटिसा द्याव्यात, असे आवाहन त्यांनी केले. विद्यार्थ्यांच्या एकजुटीचा विजय निश्चित असल्याने सर्वांनी त्यांना ताकद द्यावी, असेही त्यांनी सांगितले. या आंदोलनामुळे एमपीएससीमधील अनियमिततेच्या मुद्द्याला पुन्हा चर्चा मिळण्याची शक्यता आहे.
