देशातील सर्वात स्वस्त वैद्यकीय संस्था; जिथे ५ वर्षांची फी केवळ ५,८५६ रुपये
अनेकदा मध्यमवर्गीय व गरीब कुटुंबातील मुलांसाठी हे आकडे ऐकून डोक फिरायला लागतंय. मात्र देशात एक अशी संस्था आहे जिथे उच्च दर्जाचे शिक्षण मिळूनही ५ वर्षांची एकूण फी केवळ ५ हजार ८५६ रुपये एवढी आहे.
Eduvarta
एज्युवार्ता न्यूज नेटवर्क
भारतात डॉक्टर होण्याचे स्वप्न बहुतेकदा महागड्या शिक्षणामुळे अपूर्ण राहते. खाजगी मेडिकल कॉलेजमध्ये एका वर्षाची एमबीबीएस फी १० ते २० लाख रुपयांच्या आसपास असते. त्यामुळे अनेकदा मध्यमवर्गीय व गरीब कुटुंबातील मुलांसाठी हे आकडे ऐकून डोक फिरायला लागतंय. मात्र देशात एक अशी संस्था आहे जिथे उच्च दर्जाचे शिक्षण मिळूनही ५ वर्षांची एकूण फी केवळ ५ हजार ८५६ रुपये एवढी आहे. महिन्याला शंभर रुपयांपेक्षाही कमी खर्चात येथे विद्यार्थी डॉक्टर बनू शकतात. हे ठिकाण म्हणजेच दिल्लीस्थित अखिल भारतीय आयुर्विज्ञान संस्था म्हणजेच एम्स दिल्ली हे आहे.
एम्स दिल्ली ही भारतातीलच नव्हे तर आशियातील अग्रगण्य वैद्यकीय संस्थांपैकी एक मानली जाते. राष्ट्रीय संस्थात्मक रँकिंग फ्रेमवर्क (एनआयआरएफ) मध्ये ती सातत्याने पहिल्या क्रमांकावर राहते. येथील संपूर्ण एमबीबीएस अभ्यासक्रमाची ट्यूशन फी अवघी १ हजार ३५० रुपये आहे तर पाच वर्षांची एकत्रित फी ५ हजार ८५६ एवढीच आहे. इतकी कमी फी असूनही येथे जागतिक दर्जाच्या प्रयोगशाळा, अनुभवी प्राध्यापक आणि प्रत्यक्ष रुग्णसेवेचा मोठा अनुभव मिळतो. हॉस्टेल व मेसची सुविधाही अत्यंत माफक दराने उपलब्ध आहेत.
एम्स व्यतिरिक्त जिपमर पुडुचेरी आणि अनेक राज्यस्तरीय सरकारी मेडिकल कॉलेजमध्येही फी तुलनेने कमी असते. तरीही एम्स दिल्लीची फी सर्वात कमी आहे. मात्र, इथे हे सर्व फायदे असूनही येथे प्रवेश मिळवणे अत्यंत कठीण आहे. उमेदवारांना राष्ट्रीय पातळीवरील नीट यूजी परीक्षा द्यावी लागते. एम्स दिल्लीत जागा मिळण्यासाठी साधारणतः सातशेहून अधिक गुण आणि अखिल भारतीय क्रमवारीत १ ते ५० दरम्यानची रँक आवश्यक असते. फक्त टॉपर्सनाच येथे प्रवेश मिळतो.
अशा प्रकारे एम्स दिल्ली हे कमी फी आणि उच्च दर्जाचे शिक्षण यांचे उत्तम उदाहरण आहे. येथे प्रवेश मिळाल्यास विद्यार्थ्यांना आर्थिक बोजा न पडता उत्कृष्ट वैद्यकीय शिक्षण घेता येते. मात्र स्पर्धा प्रचंड असल्याने कठोर अभ्यास आणि उच्च गुणांची गरज असते. म्हणूनच मेहनत करणाऱ्या विद्यार्थ्यांसाठी ही संस्था स्वप्नसदृश ठरते.
