नगर रचना विभागाने 'रचना सहाय्यक' पदाची परीक्षा पुढे ढकलली

एज्युवार्ता न्यूज नेटवर्क 

महाराष्ट्र शासनाच्या नगर रचना आणि मूल्यनिर्धारण विभागांतर्गत (Department of Town Planning and Valuation) रचना सहायक (गट-ब), उच्चश्रेणी लघुलेखक व निम्नश्रेणी लघुलेखक (गट-ब) संवर्गातील रिक्त पदांच्या जागा भरण्यासाठी भरती प्रक्रिया राबवली जात आहे. मात्र, रचना सहायक गट (ब) (Structural Assistant Group A) साठी २५ ते २७ नोव्हेंबर रोजी घेण्यात येणारी परीक्षा पुढे ढकलण्यात आली आहे. काही अपरिहार्य कारणास्तव ही परीक्षा पुढे ढकलण्यात (Exam postponed) येत आहे. परीक्षेचे नवीन वेळापत्रक यथावकाश नगर रचना आणि मूल्यनिर्धारण विभागाच्या संकेतस्थळावर प्रसिध्द करण्यात येईल, असे प्रसिद्धी पत्रकात म्हटले आहे. 

नगर रचना विभागामार्फत रचना सहाय्यक पदासाठीची परीक्षा २५ ते २७ नोव्हेंबर दरम्यान आयोजित करण्यात आली आहे. त्याच दिवशी रेल्वे रिक्रूटमेंट बोर्डामार्फत (आरआरबी) ‘एएलपी’ ही परीक्षा असून, या परीक्षेसाठी टीसीएस आयओएनची अधिकृत केंद्रे देण्यात आल्याची माहिती पुढे आली आहे. त्यामुळे ही परीक्षा काही कालावधीसाठी पुढे ढकलली असल्याची शक्यता वर्तवण्यात येत आहे. 

(आरआरबी) ‘एएलपी’ परीक्षेसाठी  टीसीएस आयओएनची अधिकृत केंद्रे देण्यात आल्यामुळे रचना सहाय्यक पदासाठीची परीक्षा खासगी संगणक केंद्रांवर आयोजित केली जाण्याची शक्यता वर्तविली जात आहे. मात्र, खासगी संगणक केंद्रांवर घेतलेल्या परीक्षांमध्ये अनेकदा गैरप्रकार समोर आलेले असून, यामुळे अनेक उमेदवारांचे नुकसानही झाले आहे. त्यामुळे ही परीक्षा ‘टीसीएस’च्या अधिकृत केंद्रांवर घेण्याची मागणी या परीक्षेसाठी अर्ज केलेल्या उमेदवारांकडून होत आहे. 

निम्नश्रेणी लघुलेखक व उच्चश्रेणी लघुलेखक या पदांच्या परीक्षा दि.२६ नोव्हेंबर, २०२४ रोजी घेण्यात येत आहेत. या पदांच्या परीक्षांचे हॉल तिकीट (Hall Ticket) प्राप्त करून घेण्याबाबतची लिंक नजीकच्या कालावधीत नगर रचना आणि मूल्यनिर्धारण विभागाच्या संकेतस्थळावर उपलब्ध करून देण्यात येत आहे.