NEET UG : लिक प्रश्नपत्रिका एम्सच्या विद्यार्थ्यांनीच सोडवून दिल्या; सोल्वर गॅंगचा भांडा फोड 

एज्युवार्ता न्यूज नेटवर्क 

NEET UG पेपर लिक प्रकरणात CBI ने आतापर्यंत मोठी कारवाई केली आहे. मात्र, यावेळी झालेल्या कारवाई दरम्यान धक्कादायक खुलासा झाला आहे. पैशांच्या आमिषाला बळी पडून वैद्यकीय शिक्षण घेणार्‍या हुशार विद्यार्थ्यांनीच लिक झालेल्या प्रश्नपत्रिका सोडवून दिल्या होत्या.

एनईईटी यूजी पेपर लीक प्रकरणात यापूर्वी अटक करण्यात आलेल्या मुख्य आरोपी रॉकीच्या चौकशीच्या आधारे सीबीआयने पाटणा एम्सच्या चार वैद्यकीय विद्यार्थ्यांना अटक केली आहे. रांची रिम्समधून सुरभी कुमारी या विद्यार्थिनीला आणि  पाटणा एम्समधून चंदन सिंग, कुमार सानू, राहुल आनंद आणि करण जैन यांना अटक करण्यात आली आहे.

 सीबीआयने या विद्यार्थ्यांच्या खोल्या सील केल्या आहेत, तर मोबाईलसह सर्व इलेक्ट्रिक उपकरणे ताब्यात घेतली आहेत. सीबीआय या विद्यार्थ्यांचे कॉल डिटेल्सही काढत आहे, जेणेकरून या विद्यार्थ्यांचे गेल्या अडीच महिन्यांत कोणाशी बोलणे झाले हे कळू शकेल. या चार विद्यार्थ्यांचे ईमेल अकाऊंट आणि सोशल मीडिया अकाउंट्सचाही शोध सुरू आहे. गुरुवारी सीबीआयने चंदन सिंग, कुमार सानू, राहुल आनंद, करण जैन यांना चार दिवसांच्या कोठडीत ठेवले आहे. 

कसे झाले पेपर सोल्व्ह

खरे तर तपास यंत्रणेने या प्रकरणातील महत्त्वाच्या पात्रांना तीन दिवसांपूर्वी अटक केली होती. त्यापैकी पंकज सिंग याला पकडण्यात आले. पंकज हा आरोपी असून त्याने हजारीबागला जाताना परीक्षेपूर्वी ट्रंकमधून NEET प्रवेशाचा पेपर काढला होता. पंकजला मदत करण्यासाठी राजू सोबत होता.

राजू हा हजारीबाग येथील ओएसिस शाळेचे मुख्याध्यापक एहसान उल हक यांच्या जवळचा आहे. राजूने लीक झालेला पेपर एहसान उल हक यांना पाठवला आणि तो पेपर पटना येथील संजीव मुखिया याला पाठवला. संजीव मुखिया ने हे  पेपर त्याचा सर्वात विश्वासू मित्र रॉकीला पाठवले.  एमबीबीएसच्या विद्यार्थ्यांकडून पेपर सोडवून घेण्याची जबाबदारी रॉकीवर होती.

रॉकीने या प्रश्नपत्रिका वैद्यकीय विद्यार्थ्यांकडून सोडवून घेतले. मग ते  चिंटू या आरोपीला पाठवले. चिंटूने पुढचे काम पूर्ण केले. त्यांनी प्रश्नपत्रिका आणि उत्तरांची झेरॉक्स करून त्यांना पाटणा येथील खेमनीचक येथील सेफ हाऊसमध्ये पाठवले. याच सेफ हाऊसमध्ये लिक झालेले पेपर विकत घेणार्‍या विद्यार्थ्यांना थांबवण्यात आले  होते. विशेष म्हणजे ज्या वैद्यकीय विद्यार्थ्यांनी या प्रश्नपत्रिका सोडवून दिल्या होत्या त्या विद्यार्थ्यांनी देखील या प्रश्नपत्रिका त्यांच्या ओळखीच्या लोकांना विकल्या असतील, असा संशय CBI कडून व्यक्त केला जात आहे.