प्राध्यापकांना छळणाऱ्या प्राचार्याची संघटनेने जिरवली; नियुक्तीची चौकशी, वेतन निश्चितीला स्थगिती

एज्युवार्ता न्यूज नेटवर्क

छत्रपती संभाजीनगर येथील वसंतराव नाईक महाविद्यालयातील प्राध्यापकांना उन्हाळी सुट्यात महाविद्यालयात नियमित उपस्थित राहावे, असे आदेश काढल्यानंतर सर्व प्राध्यापकांनी रोटेशन पद्धतीने महाविद्यालयात येऊ असे सांगितले. मात्र त्याचा राग मनात धरुन आणि ही गैरवर्तुणुक समजून पंधरा प्राध्यापकांविरुद्ध नागरीसेवा अधिनियमानुसार कार्यवाही का करु नये, वाढीव वेतन का थांबवू नये, असे म्हणत प्राचार्यांनी चौकशी समिती बसवली. एवढेच नाही तर 15 जूनला प्राध्यापक महाविद्यालयात उपस्थित असताना त्यांना मस्टरवर स्वाक्ष-या करु दिल्या नाहीत.त्यावर आता सहसंचालक कार्यालयानेच संबंधित प्राचार्यांची नियुक्ती आक्षेपार्ह असल्याची चौकशी करण्याचे आणि वेतन निश्चिती न करण्याचे आदेश दिले आहेत.त्यामुळे मराठवाड्यात या घटनेची जोरदार चर्चा आहे. 

वसंतराव नाईक महाविद्यालय स्वायत्त झाले म्हणजे आम्ही मालक झालो, अशा अविर्भावात प्राध्यापकांशी अरेरावी करणे, वाह्यात बोलणे, प्राध्यापकांना छळणे हे संस्थेच्या माध्यमातून सुरु होते.त्यावर प्राध्यापक संघटनेने आवाज उठवला. या विरोधात संपूर्ण प्राध्यापकांनी एकत्र येऊन सहसंचालक आणि आपल्या बामुक्टोकड़े तक्रार केली. 

त्यावर बामुक्टोने सहसंचालक उच्च शिक्षण छ.संभाजीनगर यांच्याकडे संपूर्ण छळाविरोधात तक्रार करुन मष्टर स्वाक्ष-यासाठी उपलब्ध करुन देणे आणि प्राचार्य संजीव रेड्डी यांच्यावर नियमबाह्य नियुक्तिची चौकशी करुन त्यांचे वेतन थांबविन्याची मागणी केली.सहसंचालक यांनी मस्टरबाबत पत्र काढून संस्थेला स्वाक्ष-या करु देणे आदेश दिले आणि प्राचार्यांच्या चौकशी होईपर्यन्त वेतन थांबविन्याचे आदेश दिले.

छत्रपती संभाजी नगरच्या उच्च शिक्षण सहसंचालक डॉ. पंकजा वाघमारे यांनी याप्रकरणी डॉ. बाबासाहेब आंबेडकर मराठवाडा विद्यापीठाचे प्रकुलगुरू यांना पत्र लिहिले आहे. त्यात या प्रकरणाची उच्चस्तरीय कायदेशीर चौकशी करावी. चौकशीचा अंतिम अहवाल येईपर्यंत प्राचार्य डॉ.संजीव रेड्डी यांच्या प्राचार्य पदाच्या  वेतन निश्चितीला तात्काळ स्थगिती देण्यात यावी. कायदेशीर पडताळणी प्रलंबित असताना त्यांना कोणताही आर्थिक लाभ शासकीय निधीतून दिला जाऊ नये, असे प्रकुलगुरू यांना दिलेल्या पत्रात नमूद करण्यात आले आहे