शिक्षक हा राष्ट्राचा शिल्पकार; राष्ट्रीय मूल्यांची जपणूक काळाची गरज

एज्युवार्ता न्यूज नेटवर्क 

 “शिक्षक हा केवळ ज्ञानदान करणारा घटक नसून भावी पिढीचा शिल्पकार आहे. राष्ट्रीय शैक्षणिक धोरणाची प्रभावी अंमलबजावणी करण्यासाठी शिक्षकांनी संघटित होऊन संघटनात्मक शिस्त, सामाजिक बांधिलकी आणि राष्ट्रीय मूल्यांची जपणूक करणे ही काळाची गरज आहे,” असे प्रतिपादन पश्चिम महाराष्ट्र प्रांताचे प्रांत प्रचारक यशोवर्धन वाळिंबे यांनी केले.

अखिल भारतीय राष्ट्रीय शैक्षिक महासंघाच्या सावित्रीबाई फुले पुणे विद्यापीठ घटकाच्या वतीने ‘संघटन, कार्य, धोरण व नियोजन’ या विषयावर आयोजित एकदिवसीय अभ्यासवर्गाच्या समारोपप्रसंगी ते बोलत होते. टिळक शिक्षण महाविद्यालयातील वा. ना. दांडेकर सभागृहात हा अभ्यासवर्ग झाला.उद्घाटन सत्रात महासंघाचे राष्ट्रीय सचिव तथा महाराष्ट्र प्रांत अध्यक्ष प्रदीप खेडकर यांनी महासंघाची ध्येयधोरणे आणि विद्यापीठाच्या विविध प्राधिकरणांच्या आगामी निवडणुकांच्या पार्श्वभूमीवर मार्गदर्शन केले. विद्यापीठाच्या भविष्यातील शैक्षणिक धोरणाला दिशा देण्यासाठी अभ्यासू, सक्षम व मूल्यनिष्ठ प्रतिनिधित्व आवश्यक असल्याचे त्यांनी सांगितले.

महासंघाचे राष्ट्रीय प्रशिक्षण प्रकोष्ठ प्रमुख प्रा. डॉ. शेखर चंद्रात्रे यांनी संघटन विस्तार, कार्यकर्त्यांचे प्रशिक्षण, जबाबदाऱ्यांचे विकेंद्रीकरण आणि नियमित संपर्क याबाबत मार्गदर्शन केले. तर महासंघाचे माजी अध्यक्ष डॉ. अनिल कुलकर्णी यांनी प्राध्यापकांच्या समस्या, उच्च शिक्षणातील बदल आणि भविष्यातील विद्यापीठ धोरण यावर विचार मांडले.

अभ्यासवर्गाचे अध्यक्ष प्रा. डॉ. धोंडीराम पवार यांनी ‘राष्ट्र–शिक्षक–समाज’ या त्रिसूत्रीचा पुनरुच्चार करत शिक्षकांच्या व्यावसायिक हितासोबत राष्ट्र व समाजाच्या व्यापक हितासाठी संघटित प्रयत्नांची गरज व्यक्त केली.

कार्यक्रमास विद्यापीठाच्या विविध प्राधिकरणांवरील सदस्य, प्राचार्य, प्राध्यापक आणि शैक्षणिक क्षेत्रातील कार्यकर्ते मोठ्या संख्येने उपस्थित होते. कार्यक्रमाचे सूत्रसंचालन डॉ. राजश्री राठोड व डॉ. बाबासाहेब गव्हाणे यांनी केले, तर आभार टिळक शिक्षण महाविद्यालयाचे प्राचार्य डॉ. दीपक चव्हाण यांनी मानले.