'कॅरी ऑन पर्याय' लागू करा, या मागणीसाठी विद्यार्थ्यांनी अडवली थेट कुलगुरूंची गाडी 

एज्युवार्ता न्यूज नेटवर्क

मुंबई विद्यापीठात (Mumbai University) कॅरी ऑन पर्याय (Carry on option) लागू करण्यात यावा या मागणीसाठी विद्यार्थ्यांना थेट कुलगुरूंची गाडी अडवल्याची माहिती समोर आली आहे. इंजिनिअरिंगच्या विद्यार्थ्यांना कॅरी ऑन अंतर्गत पुढील वर्षाला प्रवेश द्यावा, या मागणीसाठी छात्र भारती विद्यार्थी संघटनेने अचानक कुलगुरू डॉ. रविंद्र कुलकर्णी (Vice Chancellor Dr. Ravindra Kulkarni) यांच्या गाडीला घेराव घातला. विद्यापीठाच्या कलिना कॅम्पसमध्ये छत्रपती शिवाजी भवनासमोर विद्यार्थ्यांकडून हे घेराव आंदोलन करण्यात आले. विद्यार्थी काही विषयात नापास झाल्याने त्यांचे वर्ष वाया जाऊ नये यासाठी विद्यार्थ्यांकडून कॅरी ऑनचा पर्याय मागितला जात आहे.

इंजिनिअरिंग विद्याशाखेतील प्रथम वर्षामध्ये अनुत्तीर्ण असणाऱ्या विद्यार्थ्यांना तृतीय वर्षाच्या पाचव्या सत्राकरिता किंवा द्वितीय वर्षामध्ये अनुत्तीर्ण असलेल्या विद्यार्थ्यांना चौथ्या वर्षाच्या सातव्या सत्राकरिता कॅरी ऑन अंतर्गत विशेष संधी यावर्षी विद्यापीठाने दिली नाही. त्यातून यंदा विद्यापीठातील पाच हजार विद्यार्थ्यांना पुढील वर्षाला प्रवेश मिळू शकणार नाही. त्यावरून कलिना कॅम्पसमध्ये छात्रभारतीच्या विद्यार्थ्यांनी 

छात्रभारतीच्या कार्यकर्त्यांनी कुलगुरूंची गाडी अडविल्याने गोंधळाची स्थिती निर्माण झाली होती. आंदोलनात जवळपास २०० विद्यार्थी सहभागी झाले होते. राज्यातील अन्य विद्यापीठे विद्यार्थ्यांना कॅरी ऑन अंतर्गत पुढील वर्षाला प्रवेश देत आहेत. मात्र मुंबई विद्यापीठ विद्यार्थ्यांना प्रवेश द्यायला नकार देत आहे. त्यामुळे अन्य विद्यापीठांप्रमाणे मुंबई विद्यापीठानेही यावर्षी विद्यार्थ्यांचा पुढील वर्षात प्रवेशाचा मार्ग मोकळा करावा, अशी मागणी विद्यार्थ्यांकडून केली जात आहे.