विद्यापीठ महाविद्यालयात पुन्हा विद्यार्थी निवडणूक होणार; शासनाकडून समिती स्थापन 

एज्युवार्ता न्यूज नेटवर्क 

राज्यातील विद्यापीठ व महाविद्यालयात विद्यापीठ निवडणूका घेण्याच्या दृष्टीने राज्य शासनाने हालचाली सुरू केल्या असून विद्यार्थी परिषदेची स्थापना आणि विद्यार्थी निवडणुकांची कार्यपद्धती निश्चित करण्यासाठी समिती स्थापन करण्यात आली आहे, याबाबत उच्च व तंत्र शिक्षण विभागाने अध्यादेश प्रसिद्ध केला आहे. माजी कुलगुरू यांच्यासह शिक्षण क्षेत्रात कार्यरत असलेल्या एकूण १२अभ्यासू व्यक्तींचा सहभाग असलेली समिती याबाबत काम पाहणार आहे.

महाराष्ट्र सार्वजनिक विद्यापीठ अधिनियम, २०१६ आणि २६ ऑक्टोबर २०१८ च्या एकरूप परिनियमांनुसार (Uniform Statutes) राज्यातील विद्यापीठे, महाविद्यालये आणि मान्यताप्राप्त संस्थांमध्ये विद्यार्थी परिषदेच्या निवडणुका शैक्षणिक, निकोप आणि विद्यार्थीकेंद्रित वातावरणात पार पाडण्यासाठी राज्य शासनाने एक उच्चस्तरीय तज्ज्ञ समिती गठित केली आहे. मुंबई विद्यापीठाचे माजी कुलगुरू डॉ. सुहास पेडणेकर यांच्या अध्यक्षतेखाली ही १२ सदस्यांची समिती स्थापन करण्यात आली असून, समितीला एका महिन्यात आपला अभ्यास पूर्ण करून शासनाला अहवाल सादर करण्याचे निर्देश देण्यात आले आहेत.

उच्च शिक्षण संचालनालयाच्या प्रस्तावानंतर शासनाने हा निर्णय घेतला आहे. विद्यार्थी परिषद निवडणुकांमधील आव्हाने, राजकीय हस्तक्षेप रोखणे, प्रातिनिधिक सहभाग वाढवणे आणि संपूर्ण प्रक्रिया पारदर्शक करणे हा या समितीच्या स्थापनेमागील मुख्य उद्देश आहे.

या समितीमध्ये खालील सदस्यांचा समावेश आहे.

१. डॉ. सुहास पेडणेकर (माजी कुलगुरू, मुंबई विद्यापीठ)– अध्यक्ष

२. डॉ. पंडित विद्यासागर (माजी कुलगुरू, स्व. रा. ती. मराठवाडा विद्यापीठ, नांदेड) – सदस्य

३. डॉ. एन. एस. उमराणी (माजी प्र-कुलगुरू, सावित्रीबाई फुले पुणे विद्यापीठ) – सदस्य

४. डॉ. अजय भामरे (प्र-कुलगुरू, मुंबई विद्यापीठ) –सदस्य

५.डॉ. प्रभाकर देसाई (अधिष्ठाता, सावित्रीबाई फुले पुणे विद्यापीठ) – सदस्य

६. डॉ. प्रशांत अमृतकर (कुलसचिव, डॉ. बाबासाहेब आंबेडकर मराठवाडा विद्यापीठ) – सदस्य

७. डॉ. संजय खरात (प्राचार्य, मॉडर्न महाविद्यालय, गणेशखिंड, पुणे) – सदस्य

८. डॉ. अविनाश मोहरील (प्राचार्य, सर परशुरामभाऊ महाविद्यालय, पुणे) –सदस्य

९. प्रा. डॉ. प्रशांत साठे (बी.एम.सी.सी. महाविद्यालय, पुणे) –सदस्य

१०. प्रा. डॉ. धोंडीराम पवार (सर परशुरामभाऊ महाविद्यालय, पुणे) –सदस्य

११. डॉ. परवीन सय्यद (से. नि. वरिष्ठ कायदा अधिकारी, सावित्रीबाई फुले पुणे विद्यापीठ) – सदस्य

१२. डॉ. प्रसाद कारंडे (कुलसचिव, मुंबई विद्यापीठ) – सदस्य सचिव

या समितीची प्रमुख कार्यकक्षा व जबाबदाऱ्या निश्चित करण्यात आल्या आहेत. त्यात निवडणुकांमध्ये कोणताही बाह्य राजकीय हस्तक्षेप किंवा निवडणुकांचे व्यापारीकरण (Commercialization) होऊ नये, यासाठी कडक नियमावली आणि उपाययोजना सुचवणे. महिला, अनुसूचित जाती (SC), अनुसूचित जमाती (ST), विमुक्त व भटक्या जमाती (VJNT), इतर मागासवर्ग (OBC) यांच्यासह NSS, NCC, क्रीडा आणि सांस्कृतिक विभागातील विद्यार्थ्यांना योग्य प्रतिनिधित्व मिळण्याची खात्री करणे.
निवडणूकीसाठी अर्ज दाखल करणे (Nomination), छाननी, मतदान आणि तक्रार निवारण प्रक्रियेमध्ये डिजिटल अथवा ऑनलाईन प्रणालीचा वापर करण्याबाबत चाचपणी करून अहवाल देणे. विद्यार्थी परिषदेचा निधी, अंदाजपत्रक (Budget) आणि खर्चाचे वेळेत लेखापरीक्षण (Audit) पारदर्शकपणे होण्यासाठी मार्गदर्शक तत्त्वे तयार करणे. निवडून आलेल्या विद्यार्थी प्रतिनिधींना त्यांच्या हक्क, कर्तव्ये आणि प्रशासकीय कामकाजाची माहिती देण्यासाठी प्रशिक्षण (Orientation and Training) कार्यक्रमांची रूपरेषा आखणे. ही कामे समितीकडे सोपवण्यात आली आहे.

या समितीच्या बैठका मुंबई विद्यापीठ येथे प्रत्यक्ष अथवा ऑनलाईन पद्धतीने आयोजित केल्या जातील. समितीचे सदस्य सचिव डॉ. प्रसाद कारंडे सर्व सदस्यांशी समन्वय साधतील. तसेच, समितीमधील अशासकीय सदस्यांचे मानधन व प्रवासभत्ता मुंबई विद्यापीठाच्या निधीतून विद्यापीठ नियमानुसार दिला जाणार आहे.