सिंहगड डेंटल कॉलेज बंद ?; कर्मचाऱ्यांचे कॉलेज बाहेर आंदोलन

एज्युवार्ता न्यूज नेटवर्क 

पुण्यातील सिंहगड डेंटल कॉलेज (Sinhagad Dental College) मधील शिक्षक व शिक्षकेतर कर्मचारी (teachers and non-teaching staff) गेल्या अनेक महिन्यांपासून पगाराच्या प्रतीक्षेत आहेत. पगार मिळत नसल्याने अखेर सर्व कर्मचाऱ्यांनी कॉलेजच्या बाहेर बेमुदत काम बंद आंदोलन (work stoppage movement)सुरू केले. त्यामुळे विद्यार्थ्यांच्या शैक्षणिक भवितव्याचा प्रश्न निर्माण झाला आहे.रुग्ण तपासणी व विद्यार्थ्यांना शिकवणे बंद झाले आहे. 

सिंहगड ग्रुप ऑफ इन्स्टिट्यूट पुण्यातील नामांकित शैक्षणिक संस्था म्हणून ओळखली जाते. परंतु, गेल्या काही वर्षांपासून प्राध्यापक व शिक्षकेतर कर्मचाऱ्यांना वेळेवर पगार दिले जात नसल्यामुळे ही संस्था चर्चेत राहिली आहे. सिंहगड डेंटल कॉलेज मधील शिक्षक व शिक्षकेतर कर्मचारी अनेक महिन्यांपासून वेतनाच्या प्रतीक्षेत आहेत. सुमारे दीड ते दोन महिन्यांपासून डेंटल कॉलेजमधील ओपीडी बंद झाली आहे. रुग्णांना तपासणी बंद झाल्यामुळे विद्यार्थ्यांचे प्रॅक्टिकल बंद झाले आहे. तसेच प्राध्यापकांकडून शिकवण्याचे कामही आता बंद करण्यात आले आहे.

वारंवार मागणी करूनही पगार मिळत नसल्याने शेवटी शिक्षक व शिक्षकेतर कर्मचाऱ्यांनी काम बंद आंदोलनाचा मार्ग स्वीकारला. मुख्यमंत्री कार्यालय, वैद्यकीय शिक्षण मंत्री हसन मुश्रीफ, महाराष्ट्र आरोग्य विज्ञान विद्यापीठाचे कुलगुरू यांना वेळोवेळी निवेदन देऊनही याप्रकरणी कोणताही तोडगा निघाला नाही. काम बंद आंदोलन केल्यामुळे विद्यार्थ्यांचे शैक्षणिक नुकसान होणार आहे, हे माहीत असूनही शिक्षकांनी आंदोलनाचा मार्ग स्वीकारला आहे. कारण गेल्या सहा महिन्यांपासून शिक्षकांचे तर सुमारे बारा महिन्यांपासून शिक्षकेतर कर्मचाऱ्यांचे पगारच झाले नसल्याचे आंदोलन कर्त्यांकडून सांगितले जात आहे. त्यामुळे केवळ नाईलाजास्तव हा आंदोलनाचा मार्ग स्वीकारला असल्याचे कर्मचाऱ्यांनी सांगितले.