SPPU: बिबट्यामुळे सूर्यास्तानंतर, सूर्योदयापूर्वी बाहेर पडणे टाळा

एज्युवार्ता न्यूज नेटवर्क 

सावित्रीबाई फुले पुणे विद्यापीठ (Savitribai Phule Pune University) परिसरात बिबट्याचा (leopard) वावर असल्यास संदर्भातील अफवांच्या पार्श्वभूमीवर विद्यापीठाच्या सुरक्षा विभागाने (University Security Department)वन विभागाशी (forest department)संपर्क साधून आवाहन करणारे परिपत्रक प्रसिद्ध केले आहे. त्यानुसार सूर्यास्तानंतर व सूर्योदयापूर्वी (After sunset and before sunrise)बाहेर पडणे टाळावे, असे आवाहन विद्यापीठाच्या सुरक्षा विभागाचे संचालक सुरेश भोसले (Director of Security Department Suresh Bhosale)यांनी केले आहे. तसेच समाज माध्यमांवरील कोणत्याही अफवांवर विश्वास ठेवू नका, असेही आवाहन केले आहे. 

विद्यापीठ परिसरात बिबट्याचा वावर असल्यास संदर्भात अफवा पसरली होती. त्यावर वनविभागाशी संपर्क साधून या माहितीची सत्यता तपासली असता सोशल मीडियावर फिरत असलेला व्हिडिओ हा औंध परिसरातील सिंध कॉलनी भागातील असल्याची माहिती मिळाली. मात्र, या घटनेच्या पार्श्वभूमीवर विद्यापीठाने परिपत्रक प्रसिद्ध केले आहे. त्यानुसार विद्यापीठ परिसरात बिबट्याचा वावर दिसल्यास तात्काळ वन विभाग व विद्यापीठाच्या सुरक्षा विभागाशी दूरध्वनीद्वारे संपर्क साधावा. वन विभागाशी संपर्क साधण्यासाठी 1926 या क्रमांकावर तर सुरक्षा विभागाशी संपर्क साधण्यासाठी 020- 48553383 किंवा 020-25621000 या दूरध्वनी क्रमांकावर संपर्क साधावा. बिबट्याबाबत वन विभागाकडून अधिकृत माहिती प्राप्त झाल्यास त्याबाबत त्वरित अवगत करण्यात येईल, त्यामुळे समाज माध्यमांवरील कोणत्याही अफवांवर विश्वास ठेवू नका.

बिबट्याच्या वावरासंदर्भात व्हिडिओ, फोटो यांची अधिकृत माहिती प्राप्त झाल्याशिवाय अथवा सत्यता पडताळणी केल्याशिवाय सोशल मीडियावर कोणीही पोस्ट करू नये. स्टेटसला ठेवू नये अथवा ग्रुप वर माहिती टाकू नये. तसेच सोशल मीडियावर भीतीदायक वातावरण निर्माण होईल, असे कृत्य करू नये,असे आवाहन वन विभागाकडून करण्यात आले असून त्याचे सर्वांनी पालन करावे.

दरम्यान, विद्यापीठातील काही कर्मचारी व अधिकारी यांच्या सह एका राजकीय पक्षाच्या पदाधिकाऱ्याने स्वत: सुरक्षा विभागातील अधिकाऱ्यांना विद्यापीठ परिसरात बिबट्या पाहिला असल्याचे सांगितले आहे.मात्र,कोणाकडेही त्याचे पुरावे नाहीत. 

विद्यापीठात दिसला बिबट्या.. 

सावित्रीबाई फुले पुणे विद्यापीठ परिसरात बिबट्या निर्दशनास आला असल्याच्या अफवेच्या पार्श्वभूमीवर विद्यापीठाने वृत्त प्रसिध्दीस दिले आहे. विद्यापीठ प्रशासनाने तात्काळ सावधगिरीचे उपाययोजना सुरू करत विद्यार्थ्यांना, रहिवाशांना तसेच अध्यापक व प्रशासकीय कर्मचाऱ्यांना सतर्कतेची सूचना दिली. तसेच सुरक्षिततेच्या दृष्टीकोनातून विद्यापीठाच्या जयकर ग्रंथालय येथील सभागृहात बिबट्या संदर्भातील जनजागृतीपर कार्यशाळेचे आयोजन केले.ही कार्यशाळा दुपारी ३.१५ ते ४.१५ या वेळेत पार पडली. या कार्यक्रमात वन विभागाचे अधिकारी कृष्णा हाके व रेस्क्यू टीमचे किरण राहीलकर यांनी बिबट्यांच्या हालचाली, त्यांच्या वर्तनातील वैशिष्ट्ये, मानव–वन्यजीव संघर्ष टाळण्यासाठी आवश्यक खबरदारी, परिसरात फिरताना घ्यावयाची सुरक्षा उपाययोजना याबाबत सविस्तर मार्गदर्शन केले. या कार्यशाळेला जयकर ज्ञानस्रोत केंद्राचे संचालक डॉ. देसले, विद्यापीठातील २०० पेक्षा अधिक विद्यार्थी, विद्यार्थिनी, सुरक्षा विभागाचे अधिकारी व कर्मचारी मोठ्या संख्येने उपस्थित होते. याच अनुषंगाने बुधवार, २६ नोव्हेंबर २०२५ रोजी विद्यापीठातील अधिकारी आणि कर्मचाऱ्यांसाठीही स्वतंत्र जनजागृती कार्यशाळा आयोजित करण्यात येणार आहे, असे विद्यापीठातर्फे कळविण्यात आले आहे.