इंद्रधनुष्य स्पर्धेमध्ये SPPU विद्यापीठाची सप्तरंगी भरारी..
एकांकीकेतील प्रथम क्रमांकासह विद्यापीठाच्या संघाला मिळाली एकूण ७ पारितोषिके, संगीत कलाप्रकारांमधील विद्यापीठाचा ठसा कायम राहिला.
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठाच्या (Savitribai Phule Pune University) विद्यार्थ्यांच्या संघाने जळगाव येथे नुकत्याच झालेल्या ‘इंद्रधनुष्य २०२५’ आंतरविद्यापीठीय युवक महोत्सवामध्ये (indradhanushya competition)एकूण ७ पारितोषिके पटकावली.विद्यापीठाच्या एकांकिकेच्या संघाने तसेच ललित कला गटामधील मातीकाम स्पर्धेमध्येही विद्यापीठाच्या विद्यार्थ्याने पहिले पारितोषिक(First prize)पटकावले.सर्व विद्यार्थ्यांचे विद्यापीठाचे कुलगुरू डॉ. सुरेश गोसावी (Vice Chancellor Dr. Suresh Gosavi)यांनी अभिनंदन केले आहे.
राज्यपाल कार्यालयामार्फत राज्यभरातील विद्यापीठांमधील विद्यार्थ्यांच्या विविध कलागुणांना वाव देण्यासाठी ‘इंद्रधनुष्य’ या आंतरविद्यापीठीय युवक महोत्सवाचे आयोजन करण्यात येते. यंदा जळगाव येथील कवयित्री बहिणाबाई चौधरी उत्तर महाराष्ट्र विद्यापीठात ३ ते ९ नोव्हेंबरदरम्यान हा युवक महोत्सव उत्साहात पार पडला. महोत्सवाचे उद्घाटन प्रसिद्ध अभिनेत्री श्रेया बुगडे यांच्या शुभहस्ते झाले. महोत्सवाच्या अखेरच्या दिवशी गायक आदर्श शिंदे यांच्या प्रमुख उपस्थितीमध्ये महोत्सवांतर्गत रंगलेल्या एकूण २९ स्पर्धांचा पारितोषिक वितरण समारंभ झाला. पुणे विद्यापीठाच्या व्यवस्थापन परिषद सदस्य बागेश्री मंठाळकरही या वेळी उपस्थित होत्या. त्यावेळी मिळालेल्या पारितोषिकांद्वारे पुणे विद्यापीठाच्या संघाने सांघिक, तसेच वैयक्तिक कलाप्रकारांमधील आपली कामगिरी दाखवून दिली.
एकांकिका व मातीकाम स्पर्धेतील प्रथम क्रमांकाबरोबरच पुणे विद्यापीठाने या महोत्सवातील भारतीय सुगम गायन, भारतीय शास्त्रीय गायन व पाश्चिमात्य एकल गायन या स्पर्धांमध्ये द्वितीय पारितोषिके पटकावली. महोत्सवातील नाट्यसंगीत व प्रश्नमंजुषा स्पर्धेत पुणे विद्यापीठाच्या संघाला तिसरे पारितोषिक मिळाले.
विद्यापीठाचे कुलगुरू डॉ. सुरेश गोसावी, प्र-कुलगुरू डॉ. पराग काळकर, प्रभारी कुलसचिव डॉ. ज्योती भाकरे यांनी सर्व संघाचे अभिनंदन केले असून सर्व कलाकार विद्यार्थ्यांना पुढील कामगिरीसाठी शुभेच्छा दिल्या आहेत. तर, विद्यापीठाचे विद्यार्थी या पुढील काळात आयोजित पश्चिम विभागीय, तसेच राष्ट्रीय युवक महोत्सवामध्येही आपली कामगिरी निश्चितच उंचावतील,असा विश्वास विद्यार्थी विकास मंडळाच्या प्रभारी संचालक डॉ. सविता कुलकर्णी यांनी व्यक्त केला आहे.
