शालार्थ आयडी घोटाळ्याचा मास्टरमार्ईंट अखेर जेरबंद, वेबसाईट हॅक करून शेकडो शिक्षकांना वाटले बनावट नियुक्तीपत्र

एज्युवार्ता न्यूज नेटवर्क 

विधिमंडळात गाजलेल्या शालार्थ आयडी घोटाळ्याला (Shalarth ID scam) आता वेगळे वळण लागले आहे. शिक्षण विभागातील बनावट शिक्षक नियुक्त्या (Fake teacher appointments) आणि शाळांच्या मान्यतांशी संबंधित या प्रकरणाचा मास्टरमाइंड म्हणून रिपब्लिकन पार्टी ऑफ इंडिया आठवले गटाचा (Republican Party of India (RPI) नेता प्रशांत वाडीले (Mastermind Prashant Vadile) याला धुळे येथून अटक (Prashant Vadile arrested) करण्यात आली आहे. पोलिसांनी पहाटे चार वाजता त्याला गाढ झोपेत असताना ताब्यात घेतले. शिक्षक आघाडीचा धुळे जिल्हाप्रमुख असलेल्या वाडीले यांच्या अटकेमुळे घोटाळ्याचे राजकीय कनेक्शन (Political connection to the scam) स्पष्ट झाले आहे. मास्टरमाईंट वाडीले याने शिक्षण विभागाची वेबसाईट हॅक करून शेकडो शिक्षकांना बनावट नियुक्तीपत्र वाटप (Distribution of fake appointment letters) केल्याची धक्कादायक माहिती तपासात समोर आली आहे.

तपासात समोर आलेल्या माहितीनुसार, प्रशांत वाडीले याने शिक्षण विभागाची वेबसाइट हॅक करून शेकडो बनावट शिक्षक नियुक्तीपत्रे जारी केली. प्रत्यक्षात अस्तित्वात नसलेल्या शाळांना जुन्या आदेशांचा दुरुपयोग करत मान्यता दाखविली. त्याच्या नावे कागदोपत्री ५४ शिक्षण संस्था आणि ६५ आश्रम शाळा आढळल्या आहेत. या बनावट व्यवस्थेच्या माध्यमातून राज्य शासनाचे तब्बल १६० कोटी रुपयांचे अनुदान हडप करण्यात आले. नाशिक रोड पोलीस ठाण्यात दाखल गुन्ह्याच्या तपासासाठी उपायुक्त संदीप मिटके यांच्या नेतृत्वाखाली एसआयटी गठित करण्यात आली होती. या पथकाने केलेल्या तपासात ही धक्कादायक माहिती समोर आली. 

विशेष म्हणजे, वाडीले याच्या साक्री आणि शिंदखेडा येथे केवळ दोन विनाअनुदानित शाळा प्रत्यक्षात चालत होत्या. उर्वरित सर्व संस्था आणि शाळा केवळ कागदावरच होत्या. बनावट कागदपत्रे तयार करून त्याने शासनाकडून अनुदान मिळविले. पोलिसांनी यापूर्वी ११ हजार पानांचे आरोपपत्र न्यायालयात दाखल केले असून, वाडीले याच्या अटकेने तपासाला नवी दिशा मिळाली आहे. 

आरपीआय नेत्याच्या या कारनाम्यामुळे शिक्षण विभागातील भ्रष्टाचाराचे वास्तव एकदा पुन्हा समोर आले आहे. बनावट नियुक्त्यांमुळे खऱ्या शिक्षकांना नोकऱ्या मिळण्यात अडथळे निर्माण झाले असल्याचेही सूत्रांनी सांगितले. पोलिस आयुक्त संदीप कर्णिक यांच्या मार्गदर्शनाखाली सुरू असलेल्या तपासात आणखी काही राजकीय व्यक्तींची नावे समोर येण्याची शक्यता वर्तवली जात आहे.

या घोटाळ्यामुळे महाराष्ट्रातील शिक्षण क्षेत्रातील विश्वासघातकी कारस्थान उघडकीस आले असून, शासनाने याबाबत कठोर कारवाई करण्याची मागणी जोर धरू लागली आहे. प्रशांत वाडीले यांच्या अटकेनंतर पोलिस अधिक तपास करत आहेत. या प्रकरणी आणखी अटक होण्याची शक्यता आहे. शिक्षण विभागानेही यासंदर्भात स्वतंत्र चौकशी सुरू केल्याचे समजते.