मुंबई विदयापीठाची सिनेट निवडणूक उद्याच; मुंबई उच्च न्यायालयाचे आदेश

एज्युवार्ता न्यूज नेटवर्क 

मुंबई विदयापीठाची स्थगित करण्यात आलेली सिनेट निवडणूक (Mumbai Vidyapeeth Senate Election) उद्याच म्हणजे 24 सप्टेंबर रोजी होणार आहे. राज्य शासनाने (State Govt) पूर्व नियोजित 22 सप्टेंबरला होणारी मुंबई विद्यापीठाची निवडणूक स्थगित करण्याचे आदेश दिले होते. या विरोधात युवा सेनेने (Yuva Sena) मुंबई उच्च न्यायालयात (Bombay High Court) धाव घेतली होती. मुंबई उच्च न्यायालयाने राज्य सरकारला दणका देत उद्याच ही निवडणूक घ्या, असे निर्देश (instructions) दिले आहेत. 

आता सिनेटची निवडणूक 24 सप्टेंबरला होणार असून 27 सप्टेंबर रोजी निकाल (Election Result) लागणार आहे. मुंबई विद्यापीठाच्या सिनेट निवडणुकीबाबत याचिकाकर्ते आणि विद्यापीठ यांच्यात न्यायालयात युक्तीवाद झाला. न्यायमूर्ती अतुल चांदूरकर आणि न्यायमूर्ती राजेश पाटील यांच्या सुट्टीकालीन खंडपीठापुढे तातडीची सुनावणी पार पडली. राज्य सरकारतर्फे महाधिवक्ता डॉ. बीरेंद्र सराफ यांनी बाजू मांडली.

शिवसेना ठाकरे गटाचे नेते वरुण सरदेसाई याबाबत बोलताना म्हणाले, "मुंबई विद्यापीठाची सिनेट निवडणूक स्थगित करण्यात आली होती त्या संदर्भात युवासेनेकडून याचिका दाखल करण्यात आली. उच्च न्यायालयाचे आम्ही आभार मानू इच्छितो कारण वेळीच त्यांनी सुनावणी घेऊन उद्याच्या उद्या निवडणूक घेण्याविषयी निर्देश दिले आहेत. हा विजय केवळ युवा सेनेचा नसून 13 हजार 500 पदवीधरांचा विजय आहे. या सरकारने जे पदवीधरांच्या बाबतीत षडयंत्र रचल होतं ते न्यायालयाने हाणून पाडले आहे. त्यासोबतच आम्ही युवासेना निवडणुकीसाठी सज्ज आहोत तसेच दहापैकी दहा जागा जिंकू असा विश्वास देखील सरदेसाई यांनी व्यक्त केला आहे.