मुंबई विभागीय मंडळ अध्यक्ष राजेंद्र अहिरेला 20 हजाराची लाच घेताना अटक; ACB ची कारवाई

एज्युवार्ता न्यूज नेटवर्क 

शिक्षण विभागातील भ्रष्ट अधिकाऱ्यांवरील कारवाईचे सत्र सुरूच असून मंगळवारी वाशी येथील मुंबई विभागीय मंडळाचे अध्यक्ष राजेंद्र अहिरे यांना 20 हजार रुपयांची लाच घेतल्याप्रकरणी रंगेहात पकडून अटक करण्यात आली. सोमवारी पुण्यातील जिल्हा परिषद कार्यालयामधील तीन कर्मचाऱ्यांना लाज घेतल्याप्रकरणी अटक करण्यात आली होती. नाशिक मध्ये सुद्धा अशाच प्रकारची कारवाई झाली. त्यामुळे शिक्षण विभागातील भ्रष्टाचार पुन्हा एकदा चव्हाट्यावर आला आहे. 

मुंबई विभागीय मंडळातील विद्युत उपकरणाच्या देखभाल दुरुस्तीचे कंत्राट एका ठेकेदाराला देण्यात आले आहे. या ठेकेदाराला नियमानुसार कायदेशीर पद्धतीने दरमहा जीएसटी सह 31 हजार 152 रुपये निश्चित करण्यात आले आहे. या कामाचे वर्षभराचे 3 लाख 16 हजार 800 रुपये इतके बील झाले होते. मात्र,या कामातील सात टक्के रक्कम लाच म्हणून राजेंद्र अहिरे यांनी मागितली. त्यावर तक्रारदाराने लाचलुचपत प्रतिबंधक विभागाकडे या संदर्भातील तक्रार दिली. लाच मागणी पडताळणी दरम्यान अहिरे यांनी वीस हजार रुपये लाच मागितल्याचे समोर आले. त्यास भांडार प्रमुख मनोहर पवार यांनी प्रोत्साहन दिल्याचे आढळून आले. त्यावर मुबई विभागीय मंडळाच्या कार्यालयात लाचलुचपत विभागाने सापळा रचून राजेंद्र अहिरे यांना वीस हजार रुपयांची लाच घेताना रंगेहात पकडले.

शिक्षण विभागात शालार्थ आयडी चा मोठा घोटाळा उघड झाला त्यावर एसआयटी स्थापन करण्यात आले आहे यात अनेक शिक्षणाधिकारी व कर्मचारी निलंबित करण्यात आले आहेत. शिक्षकांसह कंत्राट दाराकडून लाज घेतल्याचे समोर येत आहे. त्यामुळे शिक्षणासारख्या पवित्र कामाच्या ठिकाणी लाज घेतली जात असल्याने शिक्षण क्षेत्रातून संताप व्यक्त केला जात आहे.