खाजगी शाळांकडून वह्या-पुस्तक, गणवेशाच्या नावाखाली पालकांची खिसेमारी... 

एज्युवार्त न्यूज नेटवर्क 

राज्यातील अनेक खासगी शाळांकडून (Private Schools) विद्यार्थ्यांसाठी ठराविक दुकानांमधूनच वह्या-पुस्तके, गणवेश आणि शालेय साहित्य घेण्याच्या सूचना केल्या जात आहेत. काही खासगी शाळांनी दिलेल्या यादीमध्ये विशिष्ट पुस्तक विक्रेते (Book sellers) किंवा वितरण केंद्रांची नावे नमूद केली आहेत. त्या केंद्रांवरच सर्व पुस्तके आणि वह्या खरेदी करण्याचे बंधन घातले आहे. मात्र, या विक्रेत्यांकडून आव्वाच्या सव्वा भावात विक्री (Selling at exorbitant prices) करण्यात येते. ही एकप्रकारे खाजगी शाळांकडून पालकांची केलेली खिसेमारीच (The Financial Exploitation of Parents) म्हणावी लागले. 

अशी केली जाते पालकांची लुट

पुस्तकांवर बाजारपेठेतील दुकानांत १० टक्क्यांपर्यंत सवलत मिळते. शाळा मात्र कोणतीही सवलत देत नाही. दुकानांमध्ये १२ वह्यांचे दर ४०० रुपये आहेत, शाळांमध्ये या वह्यांसाठी २०० रुपये मोजावे लागतात. दुकानात एक वही ३५ रुपयांना, तर शाळेमध्ये ७५ रुपयांना मिळते. दहावीसाठीच्या १७२ पानांच्या वह्या शाळांमध्ये ७५ रुपयांना एक अशा दराने मिळतात, तर दुकानांमध्ये याच वह्या ३५ रुपयांना मिळतात. शाळांमध्ये ८० पानांच्या एक डझन वह्यांसाठी ५४० रुपयांचा दर आहे, तर दुकानांमध्ये या वह्या २९० रुपयांमध्ये मिळतात, अशा माहिती समोर आली आहे. 

संपूर्ण राज्यात अनेक खासगी व सरकारी शाळा विद्यार्थ्यांच्या पालकांना गणवेश, वह्या, पुस्तके आणि शैक्षणिक साहित्याची खरेदी फक्त विशिष्ट दुकानातूनच करण्याची सक्ती केली जात आहे. यामुळे गोरगरीब पालकांना आर्थिक भुर्दंड सहन करावा लागत आहे. शाळेच्या संगनमताने दुकानदारी चालवणाऱ्या या दुकानातील साहित्याचे दर हे बाजार भावा पेक्षा अधिकच असतात. 

मात्र, शाळा चालक हे आपले आर्थिक हित डोळ्या समोर ठेवून शैक्षणिक साहित्याची खरेदी विशिष्ट दुकानातूनच करण्याचा आग्रह पालकांकडे करीत असते.  आणि पालक देखील आपल्या पाल्याचे शैक्षणिक नुकसान होऊ नये, म्हणूनच शाळेने सुचविलेल्या दुकानातूनच शालेय साहित्याची खरेदी करतात. म्हणून पालकांची आर्थिक गळचेपी करणाऱ्या अशा शाळांवर सरकारने लवकरात लवकर कारवाई करावी,आणि पालकांची या आर्थिक लुटमारीतून सुटका करावी.
__________________________________

पूर्वेकडील ऑक्सफर्ड समजल्या जाणाऱ्या विद्येच्या माहेरघर समजल्या जाणाऱ्या पुणे शहरात आज शिक्षणाचा बाजार मांडलेला आहे. गणवेश, वह्या, पुस्तके आणि शैक्षणिक साहित्याची खरेदी फक्त विशिष्ट दुकानातूनच करण्याची सक्ती करणाऱ्या शाळांवर सरकारने लवकरात लवकर कारवाई करावी, आणि पालकांची या आर्थिक लुटमारीतून सुटका करावी. विद्यादाना सारख्या पवित्र कार्याच्या नावा खाली जर या शिक्षण संस्था गणवेश, वह्या, पुस्तके आणि शैक्षणिक साहित्याच्या नावाखाली नफेखोरी करून पालकांची आर्थिक फसवणूक करीत असतील, तर अशा शाळांवर कायदेशीररित्या कारवाई केली पाहिजेत.

- दिलीपसिंग विश्वकर्मा, अध्यक्ष, महापेरेंट्स पालक संघटना
_________________________________

शिक्षण सोडून सर्व काही हा प्रकार खाजगी संस्था आणि विशेषतः सेल्फ फायनान्स इंटरनॅशनल स्कूल यात वाढत आहे. गणवेश, बूट, रेनकोट, छत्री, सॅक्स, वॉटर बॅग, वह्या पुस्तके आणि अशा अनेक वस्तू शाळेने सुचवलेल्या ठिकाणीच घेण्याची सक्ती केली जात आहे. त्यातून प्रचंड आर्थिक लूट करण्याचे प्रकार वाढत आहेत. याचेच एक प्रकरण नुकतेच उघडकीस आले आहे. पुस्तकांच्या नावाने सुमारे चारपट रक्कम वसूल केली जात आहे असे आढळून आले, त्यामुळे सरकारने संबंधित प्रकारावर आळा घालावा. 

- महेंद्र गणपुले, माजी उपाध्यक्ष मुख्याध्यापक संघ महामंडळ