वैद्यकीय महाविद्यालयातील कार्यालय अधीक्षकाचा मृत्यू; गडचिरोलीत भीषण अपघात

एज्युवार्त न्यूज नेटवर्क 

गडचिरोली जिल्ह्यातून एक अतिशय दुःखद घटना समोर आली आहे. चामोर्शी-आष्टी मार्गावरील जामगिरी फाट्याजवळ ट्रक आणि कारमध्ये झालेल्या भीषण अपघातात (Horrific Accident Gadchiroli) गडचिरोली शासकीय वैद्यकीय महाविद्यालयाचे कार्यालय अधीक्षक (Death of the Office Superintendent) विनोद कुमरे (वय ५७ वर्षे रा. दिघोरी, नागपूर) यांचा मृत्यू झाला. या अपघातात कारमधील अन्य तीन कर्मचारी किरकोळ जखमी (3 employees injured) झाले आहेत. ते गडचिरोली येथील शासकीय वैद्यकीय महाविद्यालयात (Governmen Medical College) कार्यरत होते. 

मिळालेल्या माहितीनुसार, विनोद कुमरे हे आपल्या सहकाऱ्यांसोबत एका अंत्यविधीचा कार्यक्रम आटोपून टाटा इंडिका कारने आष्टीकडून चामोर्शीच्या दिशेने येत होते. दरम्यान, जामगिरी फाट्याजवळ समोरून येणाऱ्या ट्रकने कारला जोरदार धडक दिली. धडक इतकी भीषण होती की, कार रस्त्याशेजारील एका झाडावर जाऊन आदळली.

या अपघातात कारच्या मागील सीटवर बसलेल्या कुमरे यांच्या डोक्याला गंभीर इजा झाली. त्यांना तातडीने चामोर्शी येथील ग्रामीण रुग्णालयात दाखल करण्यात आले, मात्र उपचारादरम्यान त्यांची प्राणज्योत मालवली. कारमधील इतर प्रवासी अमोल देशपांडे (४०), कुणाल मुळके (२८) आणि योगेश वरखडे (४०) हे किरकोळ जखमी झाले आहेत. 

अपघातानंतर चामोर्शी पोलिसांनी संबंधित ट्रक चालकावर गुन्हा दाखल केला असून त्याला ताब्यात घेतले आहे. पोलीस निरीक्षक दीपक डोंब यांच्या मार्गदर्शनाखाली पोलीस उपनिरीक्षक रमेश खोब्रागडे आणि पथक या घटनेचा पुढील तपास करत आहेत.