पॉलिटेक्निक प्रवेशात क्रेझ कायम; १.४१ लाख विद्यार्थ्यांची अंतिम गुणवत्ता यादी जाहीर

एज्युवार्ता न्यूज नेटवर्क

महाराष्ट्रातील पॉलिटेक्निक अभ्यासक्रमांच्या प्रवेशासाठी (Polytechnic Course Admission) यंदाही विद्यार्थ्यांनी मोठा प्रतिसाद दिला आहे. तंत्रशिक्षण संचालनालयाने (Directorate of Technical Education) प्रसिद्ध केलेल्या अंतिम गुणवत्ता यादीत (Final merit list declared) १ लाख ४१ हजार ५ विद्यार्थ्यांचा समावेश (Includes 141,005 students) आहे. यात १०० टक्के गुण मिळवलेल्या पाच विद्यार्थ्यांसह ९० टक्क्यांहून अधिक गुण मिळवलेल्या ६ हजार ७९९ विद्यार्थ्यांनी पदविका अभियांत्रिकीला प्राधान्य दिले आहे. दहावी उत्तीर्ण विद्यार्थ्यांमध्ये पॉलिटेक्निकचा कल (Students' inclination towards polytechnics) वाढत असल्याचे स्पष्ट दिसत आहे.

अंतिम गुणवत्ता यादीत राज्यातील १ लाख ४० हजार ३६८, इतर राज्यांतील ५६८ आणि जम्मू-काश्मीरमधील ३ उमेदवारांचा समावेश आहे. यामध्ये ९३ हजार ५४२ मुले आणि ४७ हजार ३९७ मुली आहेत. राज्यात ४०० हून अधिक पॉलिटेक्निक संस्थांमध्ये एक लाख २० हजारांहून अधिक प्रवेश क्षमता उपलब्ध आहे. उद्योग क्षेत्रातील वाढती मागणी, कौशल्य विकास, पदविकेनंतर थेट नोकरीची संधी आणि पदवी अभियांत्रिकीमध्ये लॅटरल एंट्रीची उपलब्धता यामुळे विद्यार्थ्यांचा पॉलिटेक्निककडे कल वाढला आहे.

गेल्या वर्षीच्या तुलनेत यंदा अर्ज करणाऱ्या विद्यार्थ्यांची संख्या ४ हजार ९०५ ने वाढली आहे. ७० ते ८४ टक्के गुणांच्या विद्यार्थ्यांचा सहभाग लक्षणीय आहे. गुणवंत विद्यार्थ्यांमध्येही पॉलिटेक्निकला प्राधान्य मिळत असल्याचे आकडेवारीतून दिसते. ९६ ते ९९ टक्के गुण मिळवलेले ३५२ विद्यार्थी, ९० ते ९५ टक्के गुण मिळवलेले ६ हजार ४४२ विद्यार्थी, ८५ ते ८९ टक्के गुण मिळवलेले १३ हजार ९७ आणि ८० ते ८४ टक्के गुण मिळवलेले १८ हजार ५२५ विद्यार्थी यादीत आहेत.

कॉम्प्युटर इंजिनिअरिंग, मेकॅनिकल, इलेक्ट्रिकल, सिव्हिल, इलेक्ट्रॉनिक्स अँड टेलिकम्युनिकेशन आणि इन्फर्मेशन टेक्नॉलॉजी या शाखांना विद्यार्थ्यांनी मोठ्या प्रमाणात पसंती दिली आहे. आधुनिक तंत्रज्ञान आणि उद्योगानुरूप अभ्यासक्रमांमुळे पॉलिटेक्निकचे आकर्षण वाढले आहे. यामुळे दहावीनंतर उच्च शिक्षणाच्या पर्यायांमध्ये पॉलिटेक्निकचा वाटा वाढत चालला आहे.

या विद्यार्थ्यांना १३ जुलैपर्यंत संस्था आणि अभ्यासक्रमांचा पसंतीक्रम भरता येणार आहे. १५ जुलैला पहिल्या फेरीचे प्रवेश जाहीर होतील. पहिल्या फेरीत प्रवेश मिळालेल्या विद्यार्थ्यांना १६ ते १८ जुलै या कालावधीत जागा स्वीकारून प्रवेश निश्चित करता येणार आहे. संपूर्ण प्रक्रिया ऑनलाइन पद्धतीने पार पडत असल्याने विद्यार्थ्यांनी वेळेत पसंतीक्रम भरण्याचे आवाहन तंत्रशिक्षण संचालनालयाने केले आहे.