पीएचडीच्या विद्यार्थ्यांकडून पैशांची मागणी; सिनेट सदस्यांचा गंभीर आरोप; चौकशीची मागणी

एज्युवार्ता न्यूज नेटवर्क 

 डॉ. बाबासाहेब आंबेडकर मराठवाडा विद्यापीठाच्या पीएचडी विभागातील काही कर्मचाऱ्यांकडून विद्यार्थ्यांना त्रास दिला जात असून त्यांच्याकडून पैशांची मागणी केली जात असल्याचा गंभीर आरोप सिनेट सदस्य डॉ. नरेंद्र काळे यांनी केला आहे. तसेच विद्यापीठाचे प्र-कुलगुरू डॉ. प्रविण वक्ते यांच्याकडे लेखी तक्रार केली असून याबाबत चौकशीची मागणी केली आहे.

 डॉ. काळे यांनी निवेदनात म्हटले आहे की, विद्यार्थ्यांचे शोधप्रबंध (थिसिस) दाखल करून तज्ञांकडे पाठविण्याच्या प्रक्रियेत विनाकारण विलंब केला जात असून, काही प्रकरणांमध्ये आर्थिक लाभाची अपेक्षा केली जात असल्याच्या तक्रारी त्यांच्याकडे येत आहेत. विद्यार्थ्यांना पुढील अडचणी निर्माण होण्याच्या भीतीमुळे ते लेखी तक्रार करण्यास धजावत नसल्याचेही त्यांनी नमूद केले.

या प्रकरणाची तातडीने शहानिशा करून संबंधित कंत्राटी कर्मचाऱ्यांच्या बदल्या कराव्यात तसेच अशा प्रकारांना आळा बसेल, असे कडक धोरण विद्यापीठाने अवलंबावे, अशी मागणी त्यांनी केली आहे.

पीएचडी विभाग भ्रष्टाचारमुक्त आणि विद्यार्थ्यांसाठी सुलभ व पारदर्शक व्हावा, अशी अपेक्षाही त्यांनी व्यक्त केली आहे. तसेच या प्रकरणात योग्य कार्यवाही न झाल्यास आंदोलनाचा मार्ग स्वीकारावा लागेल, असा इशाराही डॉ. काळे यांनी दिला आहे.

दरम्यान, पीएचडी विभागासंदर्भात ज्यांच्या तक्रारी असतील, त्या विद्यार्थ्यांनी आपल्याकडे तक्रारी दाखल कराव्यात, असे आवाहनही डॉ. नरेंद्र काळे यांनी केले आहे.