दादा भुसे राज्याचे नवे शालेय शिक्षणमंत्री

एज्युवार्ता न्यूज नेटवर्क 

देवेंद्र फडणवीस यांनी ५ डिसेंबर रोजी मोठ्या थाटात (Chief Minister Devendra Fadnavis) राज्याचे नवनिर्वाचित मुख्यमंत्री म्हणून शपथ घेतील. त्यानंतर मंत्रिमंडळाचा विस्तार कधी होणार याची अतुरता सर्वांना लागली होती. अखेर मंत्रिमंडळ विस्तार देखील करण्यात आला मात्र, पण खाते वाटप  (Account Allocation Announced) झाले नव्हते. अखेर शनिवार रोजी सायंकाळी खातेवाटप करण्यात आले असून दादा भुसे (Minister of School Education Dada Bhuse ) यांच्याकडे शालेय शिक्षण मंत्री या खात्याची जबाबदारी देण्यात आली आहे. तर चंद्रकांत पाटील यांच्याकडे उच्च व तंत्रशिक्षण हे खात कायम ठेवण्यात आले आहे.

मंत्रिमंडळ विस्तार झाल्यापासून खातेवाटपामध्ये राज्याचे शालेय शिक्षण मंत्रीपद आणि उच्च व तंत्र शिक्षण मंत्री पद कोणाच्या वाट्याला जाणार याबाबत तर्क वितर्क लावले जात होते.अखेर या सर्व चर्चांना पूर्णविराम मिळाला आहे. 

राज्याचे माजी शालेय शिक्षण मंत्री दीपक केसरकर यांचा मंत्रीपदाच्या यादीतून पत्ता कट करण्यात आला होता. त्यामुळे शिक्षणमंत्री पद पुन्हा शिवसेनेच्या वाट्याला येणार की अन्य पक्षाला वाट्याला जाणार याकडे सर्वांचे लक्ष लागले होते. या खात्यावर कोणाची वर्णी लागणार याकडे सर्वांना उत्सुकता होती. दादा भुसे या स्वच्छ प्रतिमेच्या व्यक्तीकडे शालेय शिक्षणमंत्री हे खाते दिल्याने सर्वसामान्यांच्या अपेक्षा वाढल्या आहेत. 

एकनाथ शिंदे यांच्या मंत्रीमंडळात शालेय शिक्षण मंत्री पदीची जबाबदारी दीपक केसरकर यांच्याकडे देण्यात आली. शालेय गणवेश वाटपात झालेल्या दिरंगाई, शिक्षक भरती, संचमान्यता, कंत्राटी शिक्षक भरती यांच्यासारख्या अनेक मुद्द्यामुळे त्यांच्यासह संपूर्ण सरकारवर विरोधकांनी टिकेची झोड उठवली होती. त्यामुळे सरकारला अनेक गोष्टींना सामोरे जावे लागले. त्यामुळे मंत्रीमंडळातून केसरकर यांचा पत्ता कट करण्यात आला असल्याच्या चर्चा सुरू आहेत.