प्रजासत्ताक दिन साजरा करण्यासाठी शासनाच्या शाळांना या सूचना
राज्यातील प्रत्येक शाळांकडून प्रभात फेरी, भाषण स्पर्धा, नृत्य यांसारखे उपक्रम घेऊन हा प्रजासत्ताक दिन साजरी करावा, यांसारख्या महत्त्वाच्या सूचना शासनाने दिले आहेत.
eduvarta@gmail.com 
एज्युवार्ता न्यूज नेटवर्क
प्रजासत्ताक दिन (Republic Day) हा देशाच्या स्वातंत्र्याचा आणि लोकशाही मूल्यांचा उत्सव साजरा करण्याचा दिवस आहे. या दिवशी आपल्या देशाची समृद्ध संस्कृती, इतिहास आणि भविष्य याबद्दल विद्यार्थ्यांमध्ये अभिमान निर्माण करणे अत्यंत महत्त्वाचे आहे. त्या अनुषंगाने राज्यातील प्रत्येक शाळांकडून प्रभात फेरी, भाषण स्पर्धा, नृत्य यांसारखे उपक्रम (School activities) घेऊन हा प्रजासत्ताक दिन साजरा करावा, यांसारख्या महत्त्वाच्या सूचना शासनाने दिल्या आहेत.
प्रजासत्ताक दिनांकानिमित्त सामान्य प्रशासन विभागामार्फत दरवर्षी परिपत्रकाद्वारे सूचना देण्यात येतात. त्याचप्रमाणे यंदाही काही सूचना देण्यात आल्या आहेत. या परिपत्रकात देण्यात आलेल्या सर्व सूचनांचे पालन शाळांना करावे लागणार आहे. प्रजासत्ताक दिनी राज्यातील सर्व माध्यमाच्या शासकीय व खाजगी व्यवस्थापनाच्या सर्व शाळांनी खालील उपक्रम राबवावेत. यासाठी प्रत्येक गावातील स्वातंत्र्य सैनिक, माजी सैनिक, लोकप्रतिनिधी, शालेय व्यवस्थापन समिती, शिक्षक पालक संघ व प्रतिष्ठित नागरिक यांचा सक्रिय सहभाग घ्यावा.
शाळांना देण्यात आलेल्या सूचना
शाळेमध्ये ध्वजारोहणानंतर विद्यार्थ्यांनी राष्ट्रगीत गायन, राज्यगीत गायन, भारतीय राज्यघटनेच्या सरनाम्याचे वाचन, देशभक्तीपर गीत गायन करावे. शाळेच्या परिसरात प्रभात फेरी काढावी. विद्यार्थ्यांकरिता स्वातंत्र्य सेनानी, देशभक्ती, लोकशाही इत्यादी विषयांवर भाषण करण्याची स्पर्धा आयोजित करावी. विद्यार्थ्यांनी स्वतः लिहिलेल्या किंवा इतर कवींनी लिहिलेल्या देशभक्तीपर कवितांचे वाचन करावे. विद्यार्थ्यांकरिता देशभक्तीपर गाण्यांवर नृत्य करण्याची स्पर्धा आयोजित करावी. विद्यार्थ्यांकरिता देशभक्तीपर विषयांवर चित्र काढण्याची स्पर्धा आयोजित करावी. विद्यार्थ्यांकरिता देशभक्ती, स्वातंत्र्य लढा इत्यादी विषयांवर निबंध लिहिण्याची स्पर्धा आयोजित करावी. विद्यार्थ्यांसाठी विविध प्रकारचे खेळ आयोजित करावेत. विद्यार्थ्यांनी तयार केलेल्या हस्तकला, चित्रकला इत्यादींची प्रदर्शनी आयोजित करावी. उपरोक्त कार्यक्रम आयोजित करताना विद्यार्थ्यांच्या वयोगटाचा विचार करावा, अशा सूचना देण्यात आल्या आहेत.
