SPPU विद्यापीठाच्या हिटलरशाही विरोधात विद्यार्थी संघटना आक्रमक; परिपत्रक रद्दची मागणी

एज्युवार्ता न्यूज नेटवर्क 

SPPU NEWS : सावित्रीबाई फुले पुणे विद्यापीठ प्रशासनाने (Savitribai Phule Pune University Administration)परिपत्रक काढून पुणे विद्यापीठ आवारामध्ये त्याचबरोबर नाशिक व अहिल्यानगर येथील उपकेंद्रांच्या आवारांमध्ये कोणतेही कार्यक्रम, उपक्रम, आंदोलन, पथनाट्य (Programs, activities, agitations, street plays)किंवा कोणतेही जागृतीपर अभियान, असे कार्यक्रम घ्यावयाचे असल्यास किमान ८ दिवस आधी विद्यापीठाची परवानगी घेणे आवश्यक केले आहे. मात्र, विद्यापीठाने हा हिटलरशाही सारखा हुकूम (Dictator like Hitler)काढला. या विरोधामध्ये अखिल भारतीय विद्यार्थी परिषदेने (Akhil Bharatiya Vidyarthi Parishad- ABVP)तत्काळ आक्रमक भूमिका घेत निदर्शने केली.त्याचप्रमाणे विविध विद्यार्थी संघटनांनी विद्यापीठाच्या परिपत्रकास विरोध केला आहे.

 सावित्रीबाई फुले पुणे विद्यापीठाच्या मुख्य इमारती बाहेर अभाविपचे कार्यकर्ते व अन्य विद्यार्थी एकत्रित येऊन आक्रमक झाले. संबंधित परिपत्रक तत्काळ रद्द करावे आणि कोणतेही कार्यक्रम, उपक्रम, अभियान, आंदोलन किंवा पथनाट्य अशा पद्धतीचे कार्यक्रम घेण्याच्या पूर्वपरवानगीचा कालावधी २४ तास करण्यात यावा यासाठी अखिल भारतीय विद्यार्थी परिषदेने मागणी केली. यावेळी सुरक्षारक्षकांचे कडं भेदून मुख्य इमारती बाहेर जाऊन आंदोलकांनी घोषणा दिल्या. त्यानंतर विद्यापीठाच्या प्रभारी कुलसचिव डॉ. ज्योती भाकरे यांच्याबरोबर चर्चा करून आंदोलन थांबवण्यात आले.

अभाविपचे पुणे महानगर मंत्री हर्षवर्धन हरपुडे म्हणाले , “सावित्रीबाई फुले पुणे विद्यापीठ एका बाजूला दोन दिवसांमध्ये स्वतःचे गेस्ट हाऊस हे लग्नाच्या वऱ्हाडासाठी पूर्णतः देऊन टाकते.  पण विद्यार्थ्यांना जागृती पर कार्यक्रम घेण्यासाठी आणि विद्यार्थ्यांना स्वतःचे हक्क मागण्यासाठी ८ दिवस आधी परवानगी घ्यावी, हा नियम अत्यंत चुकीचा आहे. त्यामुळे हे परिपत्रक तत्काळ रद्द न झाल्यास अभाविप अधिक तीव्र स्वरूपाचे आंदोलन करेल.”

“पुणे विद्यापीठ कॅम्पस मध्ये अनेक प्रकारच्या समस्या वेळोवेळी येत असतात, मग त्या हॉस्टेल, मेस किंवा कोणत्याही स्वरूपातील असतील, त्यासाठी ८ दिवस आधी परवानगी कशी मागणार? आणि कोणताही कार्यक्रम किंवा महापुरुषांच्या जयंती साजरी करण्यासाठी सुद्धा विद्यापीठाची ८ दिवस आधी परवानगी मागणे हे अत्यंत चुकीचे आहे.” असे अभाविपचे सावित्रीबाई फुले पुणे विद्यापीठ अध्यक्ष आदित्य डुंबरे यांनीसांगितले. 

-------------------------------

प्रभारी कुलसचिव डॉ. ज्योती भाकरे यांना भेटून परिपत्रक रद्द करण्याची मागणी केली. विद्यार्थ्यांच्या मूलभूत प्रश्नांवर तसेच शैक्षणिक गुणवत्तेसंबंधी अशीच ठाम भूमिका का घेत नाहीत?  असा सवाल त्यांच्या समोर उपस्थित केला. या भेटीदरम्यान, स्थालांतरित विद्यार्थ्यांच्या समस्यांकडे लक्ष वेधण्यासाठी गांधीगीरीचा मार्ग निवडून त्यांना आरोग्य सर्वेक्षण अहवाल सादर करण्यात आला,असे स्टुडंट हेल्पिंग हँड्सचे अध्यक्ष कुलदीप आंबेकर यांनी सांगितले. 

-------

विद्यार्थी, संघटनांचे हक्क आणि अधिकार हिरावून घेणारे संविधान विरोधी परिपत्रक विद्यापीठ प्रशासनाने तत्काळ मागे घ्यावे. आमच्या हक्कांवर गदा आणू नये, आंदोलन करण्याची वेळच आमच्यावर येणार नाही,यासाठी थोडे प्रयत्न केले तर अधिक उत्तम होऊ शकते. सर्वच आंदोलने, बैठका पूर्वनियोजित नसतात.

- कमलाकर शेटे, राज्य कार्यकारी सदस्य, युक्रांद 

--------------------------

सावित्रीबाई फुले पुणे विद्यापीठामध्ये विधी विभागाच्या माजी प्रमुख व कायद्याच्या जाणकार असलेल्या डॉ. ज्योती भाकरे या विद्यापीठाच्या प्रभारी कुलसचिव पदाचा कार्यभार सांभाळत आहेत. त्यांच्याकडून अशाप्रकारचे अंसविधानिक परिपत्रक निघत असेल तर त्या कोणत्या विचारधारेची पालखी आपल्या खांद्यावर वाहत आहेत असा प्रश्न निर्माण होणे साहजिक आहे. आम्हाला सदरील कुलसचिव या संविधानाच्या तसेच कायदाच्या जाणकार असल्यामुळे त्यांच्याकडून जास्त अपेक्षा आहेत.परंतु, त्यांनी विद्यापीठातील विद्यार्थ्यांचा स्वप्न भंग केलेला आहे. 
- ॲड. अक्षय चंद्रकांत दहिफळे, माजी विद्यार्थी, विधी विभाग

-------------------------------