'शालार्थ ID'साठी घेतली १ लाखाची लाच;पुणे शिक्षण उपसंचालक कार्यालयात रंगेहात पकडले

एज्युवार्ता न्यूज नेटवर्क 

राज्यात शालार्थ आयडी घोटाळा गाजत असताना पुण्यात ' शालार्थ आयडी' साठी  तब्बल एक लाख रुपयांची लाच घेताना शिक्षण उप निरीक्षकाला लाचलुचपत विभागाने रंग हात पकडले. रावसाहेब मिरगणे असे लाच घेताना पकडण्यात आलेल्या पुणे विभागीय शिक्षण उपसंचालक कार्यालयातील कर्मचाऱ्यांचे नाव आहे. राज्यातील शालार्थ आयडी घोटाळ्याची चौकशी करण्यासाठी एसआयटी स्थापन केलेली असताना अजूनही पैसे घेऊन शालार्थ आयडी दिला जात असल्याने शिक्षण विभाग अधिकच बदनाम होत आहे.

पोलिसांनी दिलेल्या माहितीनुसार तक्रारदार यांची पत्नी सोलापूर जिल्ह्यात एका माध्यमिक शाळेत सहशिक्षिका म्हणून नोकरीस आहे. त्यांना शालार्थ आयडी' नसल्याने त्या 2016 पासून विना वेतन काम करत होत्या. त्यांचा शालार्थ आयडी मंजूर झाल्यानंतर त्यांना वेतन चालू होणार होते. सदरचा शालार्थ आयडी मंजूर करण्यासाठी यातील तक्रारदार यांनी त्यांच्या पत्नीचा शालार्थ आयडी चा प्रस्ताव  16/6/2025 रोजी सोलापूर विभागाचे शिक्षणाधिकारी यांच्यामार्फत विभागीय शिक्षण उपसंचालक कार्यालय पुणे येथे दाखल केला होता. सदरचा प्रस्ताव 'ई- ऑफिस' मार्फत विभागीय शिक्षण उपसंचालक पुणे यांना सादर करण्यासाठी व तो प्रस्ताव मंजूर करून देण्यासाठी विभागीय शिक्षण उप संचालक यांच्या कार्यालयातील शिक्षण उपनिरीक्षक या पदावर कार्यरत असलेले आरोपी मिरगणे यांनी तक्रारदार यांच्याकडे 1 लाख रुपयाच्या लाचेची मागणी केली असल्याबाबतची तक्रार लाचलुचपत प्रतिबंधक विभाग पुणे येथे प्राप्त झाली होती.

 या तक्रारीच्या अनुषंगाने 17 नोव्हेंबर ते 21 नोव्हेंबर या काळात लाच मागणी पडताळणी करण्यात आली. तसेच 21 नोव्हेंबर रोजीच्या विभागीय शिक्षण उपसंचालक पुणे यांच्या कार्यालयात झालेल्या पडताळणी दरम्यान आरोपी रावसाहेब मिरगणे, शिक्षण उपनिरीक्षक, यांनी तक्रारदाराच्या पत्नीची 'शालार्थ आयडी' मंजूर करून देण्यासाठी 1 लाख रुपयाच्या लाचेची मागणी करून ती लाच रक्कम स्वीकारण्याची तयारी दर्शवल्याचे निष्पन्न झाले. त्यानंतर शिक्षण उप निरीक्षक रावसाहेब मिरगणे यांनी 25 नोव्हेंबर रोजी सायंकाळी साडे सहाच्या सुमारास विभागीय शिक्षण उपसंचालक कार्यालयामध्ये स्वतःच्या केबिनमध्ये तक्रारदाराकडून 1 लाख रुपयाची लाच पंचासमक्ष स्वीकारताना रंगेहाथ पकडण्यात आले आहे.

रावसाहेब मिरगणे यांना ताब्यात घेऊन त्यांच्याविरुद्ध बंडगार्डन पोलीस ठाणे येथे भ्रष्टाचार प्रतिबंधक कायद्यानुसार गुन्हा दाखल करण्याची प्रक्रिया रात्री उशिरा सुरू होती. शिक्षण विभागातील ही कारवाई पोलीस उप आयुक्त/पोलीस अधीक्षक शिरीष सरदेशपांडे, ला.प्र.वि. पुणे परिक्षेत्र, पुणे व अपर पोलीस अधीक्षक अजीत पाटील, ला.प्र.वि. पुणे, अपर पोलीस अधीक्षक अर्जुन भोसले, ला.प्र.वि. पुणे यांचे मार्गदर्शनाखाली पुणे लाचलुचपत प्रतिबंधक विभागाने केली.