मुंबई विद्यापीठ: स्पर्धा परीक्षेसाठी मोफत मार्गदर्शन केंद्र स्थापनेस सामाजिक न्याय मंत्रालयाची मान्यता
सामाजिक मागास घटकातील विद्यार्थ्यांना या निर्णयाचा मोठा फायदा होणार आहे. विविध स्पर्धा परीक्षांची तयारी करून या विद्यार्थ्यांना शासकीय सेवेत जाण्याची संधी मिळणार आहे.
eduvarta@gmail.com 
एज्युवार्ता न्यूज नेटवर्क
सामाजिक न्याय व सक्षमीकरण मंत्रालयाच्या (Ministry of Social Justice and Empowerment)डॉ.बाबासाहेब आंबेडकर फाउंडेशनने (Dr. Babasaheb Ambedkar Foundation) मुंबई विद्यापीठात 'डॉ. बाबासाहेब आंबेडकर सेंटर ऑफ एक्सलन्स'ची (Dr. Babasaheb Ambedkar Centre of Excellence)स्थापना करण्याचा निर्णय घेतला आहे. मुंबई विद्यापीठाबरोबर (Mumbai University) याबाबतचा सामाजिक करार लवकरच केला जाणार आहे. त्यामुळे या केंद्राच्या माध्यमातून अनुसूचित जाती,इतर मागासवर्गीय आणि पीएम केअर्स योजनेतील विद्यार्थ्यांना स्पर्धा परीक्षांसाठी मोफत मार्गदर्शन उपलब्ध होणार आहे.
डॉ.आंबेडकर फाउंडेशनच्या माध्यमातून स्थापन होणाऱ्या या केंद्रातून केंद्रीय लोकसेवा आयोग, राज्य लोकसेवा आयोग तसेच इतर केंद्रीय आणि राज्यस्तरावरील विविध परीक्षांसाठी इच्छुक विद्यार्थ्यांना उच्च दर्जाचे प्रशिक्षण व मार्गदर्शन त्याचप्रमाणे अध्ययन सामग्री आणि वैयक्तिक सल्ला व समुपदेशन केले जाणार आहे.त्यामुळे सामाजिक मागास घटकातील विद्यार्थ्यांना या निर्णयाचा मोठा फायदा होणार आहे. विविध स्पर्धा परीक्षांची तयारी करून या विद्यार्थ्यांना शासकीय सेवेत जाण्याची संधी मिळणार आहे.
विद्यापीठाचे कुलगुरू डॉ.रवींद्र कुलकर्णी म्हणाले, मुंबई विद्यापीठात 'डॉ.बाबासाहेब आंबेडकर सेंटर फॉर एक्सलन्स' स्थापन होणे हे सामाजिक न्याय आणि समावेशक शिक्षणाच्या दिशेने ऐतिहासिक पाऊल आहे. या केंद्राच्या माध्यमातून वंचित घटकातील विद्यार्थ्यांना उत्तम मार्गदर्शन मिळू शकेल. तसेच प्रशासकीय व सामाजिक सेवांमध्ये त्यांना अधिक प्रभावीपणे सहभागी होता येईल.
