शिक्षकांचा उमेदवार शिक्षकच असावा; शिक्षक संघटनाही निवडणूकीत उमेदवार उतरवणार? स्थानिक आमदाराचे काय?
अनेक नवीन चेहरे शिक्षक मतदार संघातून विधान परिषदेवर निवडून जाण्यास इच्छुक आहेत. त्यात पुण्यातील मॉर्डन एज्युकेशन सोसायटीचे विश्वस्त म्हणजेच वाडिया कॉलेज मधील प्राध्यापक सचिन सानप यांचा समावेश आहे.
Eduvarta
एज्युवार्ता न्यूज नेटवर्क
शिक्षक व पदवीधर निवडणुकीच्या धुमाळीला सुरुवात झाली असून अनेक उमेदवार निवडणुकीच्या रिंगणात उतरले आहेत. मात्र, त्यात मंत्री उदय सामंत यांचे निकटवर्तीय सचिन सानप, उपमुख्यमंत्री एकनाथ शिंदे यांच्या जवळचे मंगेश चिवटे, शिक्षक-मुख्याध्यापक संघटनेचे नंदकुमार सागर आणि आमदार जयंत आसगावकर यांच्यासह इतरही उमेदवार पुणे विभागाच्या शिक्षक मतदार संघाच्या निवडणुकीच्या रिंगणात आहेत. त्यामुळे ही निवडणूक अत्यंत चुरशीची होणार आहे.
गेल्या काही महिन्यांपासून शिक्षण हा विषय मोठ्या प्रमाणावर चर्चेला येत आहे. देशभरात शिक्षण विषयक प्रश्नांवर आंदोलने सुरू आहेत. विद्यार्थी सुद्धा आपल्या शैक्षणिक हक्काबाबत जागृत झाले असून सोशल मीडियावर व्यक्त होताना दिसत आहेत. त्यातच आता शिक्षक मतदार संघाच्या निवडणुकीच्या रणधुमाळीला सुरुवात झाली आहे. अनेक इच्छुक उमेदवार आपापल्या परीने मतदार नोंदणी प्रक्रिया राबवत आहेत. अनेक नवीन चेहरे शिक्षक मतदार संघातून विधान परिषदेवर निवडून जाण्यास इच्छुक आहेत. त्यात पुण्यातील मॉर्डन एज्युकेशन सोसायटीचे विश्वस्त म्हणजेच वाडिया कॉलेज मधील प्रा.सचिन सानप यांचा समावेश आहे. नुकतेच त्यांनी इच्छुक उमेदवार म्हणून मुलाखतही दिली आहे.सानप यांचे नाव चर्चेत आल्याने निवडणूकीची समीकरणे बदलली आहेत. सुमारे १६ वर्षे त्यांनी प्राध्यापक म्हणून काम केले आहे. तसेच शिक्षकांचा उमेदवार हा शिक्षकच असावा, अशी भूमिका घेऊन ते निवडणूकीच्या रिंगणात उतरले आहेत.
एकनाथ शिंदे यांच्या टीममधील मंगेश चिवटे हे सुद्धा निवडणूक लढण्यास इच्छुक आहेत. पुणे शिक्षक मतदार संघातून त्यांना उमेदवारी मिळावी यासाठी शिंदे गटाचे काही आमदार चिमटे यांना पाठिंबा देत असल्याचे दिसून येत आहे. चिवटे यांना उमेदवारी मिळावी यासाठी काही स्थानिक आमदार प्रयत्न करत आहेत.
शिक्षक मतदार संघातून निवडून जाणारा उमेदवार हा शिक्षकच असावा, अशी भूमिका सचिन सानप यांनी केली असली तरी अनेक वर्षांपासून शिक्षण क्षेत्रात काम करणारे नंदकुमार सागर हे सुद्धा निवडणूक लढणार आहेत. गेल्या 33 वर्षात शिक्षणाक्षेत्रात केलेल्या कामाच्या जोरावर मतदारांकडे ते उमेदवार म्हणून पोहोचण्याचा प्रयत्न करत आहेत.
शिक्षक आमदार जयंत आसगावकर यांनी शिक्षकांच्या प्रश्नांबाबत रस्त्यावर तसेच सभागृहात पोट तिडकेने भूमिका मांडली. त्यामुळे यापुढील काळातही उर्वरित प्रश्न सोडवण्यासाठी उमेदवारांनी त्यांना पाठिंबा द्यावा, या अपेक्षेने आसगावकर पुन्हा महाविकास आघाडीच्या तिकिटावर निवडणूक लढण्यास इच्छुक आहेत.
--------------------------------------------
शिक्षक मतदारसंघातून निवडून जाणारा प्रतिनिधी हा शिक्षकच असला पाहिजे.अनेक वर्षांपासून मी शिक्षण क्षेत्रात असून स्वत: प्राध्यापक आणि शिक्षण संस्थेचा विश्वस्त म्हणून काम करत आहे.मंत्री उदय सामंत यांचा स्वीय सहाय्यक म्हणूनही काम केले असल्यामुळे शिक्षण क्षेत्रातील विविध विषयांची मला जाण आहे. जुनी पेन्शन योजना शिक्षक व शिक्षकेतर कर्मचाऱ्यांना अद्याप लागू झालेली नाही. संच मान्यतेच्या धोरणामुळे शाळांवर विपरीत परिणाम होत आहे. राष्ट्रीय शैक्षणिक धोरणातील तरतुदींच्या आधारे शिक्षकांचा उचित कार्यभार निश्चित करण्यात आलेला नाही.त्याचा शिक्षण क्षेत्रावर वाईट परिणाम होत आहे. असे अनेक प्रश्न सोडवण्यासाठी मी शिक्षक मतदारसंघातून निवडणूक लढविल्यास इच्छुक आहेत.
- प्रा. सचिन सानप, विश्वस्त मॉडर्न एज्युकेशन सोसायटी,पुणे,
------------------------------------------------------------------
शिक्षकांना शिकवू द्या आणि विद्यार्थ्यांना शिकू द्या. संच मान्यतेमुळे निर्माण झालेला गंभीर प्रश्न दूर व्हावा. बंद पडत चाललेल्या शाळांवर शासनाने लक्ष केंद्रित करावे, अशा मुद्द्यांवर मी निवडणूक लढणार आहे.शिक्षक आमदार म्हणून मी शिक्षक, मुख्याध्यापक व संस्थाचालकांचे अनेक प्रश्न सभागृहात मांडून त्यातील बहुतेक प्रश्न सोडवण्याचा प्रामाणिक प्रयत्न केला. मात्र आजही अनेक गंभीर प्रश्न प्रलंबित आहेत.
- जयंत असगावकर, शिक्षक आमदार,
----------------------------------------
गेली ३३ वर्षे पुणे, सोलापूर, सातारा, सांगली आणि कोल्हापूर जिल्ह्यांतील शिक्षक, मुख्याध्यापक, शिक्षकेतर कर्मचारी व संस्थाचालक यांच्या विविध प्रश्नांसाठी सातत्याने कार्यरत आहे. शिक्षण क्षेत्रातील प्रश्न केवळ कागदावर वाचलेले नाहीत, तर ते प्रत्यक्ष अनुभवले असून त्यांच्या सोडवणुकीसाठी चर्चा, निवेदने, पाठपुरावा आणि प्रसंगी आंदोलनाच्या माध्यमातून संघर्ष केला आहे. आजही शिक्षक, मुख्याध्यापक, शिक्षकेतर कर्मचारी आणि संस्थाचालकांसमोरील अनेक प्रश्न प्रलंबित आहेत. त्यामुळे शिक्षण क्षेत्राशी प्रत्यक्ष नाळ जोडलेला आणि या सर्व घटकांच्या अडचणींची जाण असलेला प्रतिनिधी विधानपरिषदेत असणे आवश्यक आहे. माझ्या ३३ वर्षांच्या अनुभवाच्या बळावर पुणे विभाग शिक्षक मतदारसंघातून शिक्षण क्षेत्राचा प्रभावी आवाज बनण्याची माझी इच्छा आहे.
- नंदकुमार सागर, सचिव, महाराष्ट्र राज्य मुख्याध्यापक महामंडळ,
