पुणे पदवीधर निवडणूकीचे गणित बिघडले; आयात उमेदवाराला विरोध होणार?
माजी सनदी अधिकारी प्रभाकर देशमुख यांच्या कन्या हर्षदा देशमुख-जाधव या सुध्दा पदवीधर निवडणूक लढण्यास इच्छुक आहेत.त्यातच कॉग्रेस पक्षाने पदवीधर बाबत आपली भूमिका स्पष्ट केली नाही.परंतु, ऋषिकेश महेंद्र लाड हे आमदार विश्वजीत कदम यांचे नातेवाईक असून त्यांना कॉग्रेसकडून उभे केले जाऊ शकते.
Eduvarta
एज्युवार्ता न्यूज नेटवर्क
पुणे पदवीधर निवडणूकीवरून भारतीय जनता पक्ष व राष्ट्रवादी कॉग्रेस अजित पवार गट यांच्यात वाद सुरू असल्याचे दिसून येत आहे.पदवीधरांचा उमेदवार कोण असावा? यावरून रस्सीखेच सुरू असताना केवळ पदवीधर निवडणूक समोर ठेऊन भारतीय जनता पक्षात प्रवेश केलेल्या उमेदवाराला पाठिंबा देण्यास भाजप कार्यकर्त्यामध्ये नाराजी असल्याची चर्चा आहे.तसेच राष्ट्रवादी पक्षात फुट पडली नव्हती त्यावेळी अरूण लाड पदवीधरमधून निवडून आले होते.त्यातच शरद पवार यांच्या पक्षांकडूनही उमेदवार दिला जाण्याची शक्यता आहे.त्यामुळे यंदा पदवीधर निवडणूकीचे गणित बिघडले असल्याचे दिसून येत आहे.परिणामी यावेळी पुणे पदवीधर निवडणूक अधिक रंगतदार होण्याची शक्यता आहे.
पुणे पदवीधर मतदार संघातून यापूर्वी दोन वेळा निवडून आलेले मंत्री चंद्रकांत पाटील यांनी शरद लाड यांना पदवीधरची उमेदवारी मिळावी,असा आग्रह असल्याचे बोलले जात आहे.मात्र, कोल्हापूरचे राष्ट्रवादी कॉग्रेसचे नेते हसन मुश्रीफ यांनी आपले नातेवाईक भैय्या माने यांना उमेदवारी मिळावी, अशी स्पष्ट भूमिका घेतली आहे.त्यातच माजी सनदी अधिकारी प्रभाकर देशमुख यांच्या कन्या हर्षदा देशमुख-जाधव या सुध्दा पदवीधर निवडणूक लढण्यास इच्छुक आहेत.त्यातच कॉग्रेस पक्षाने पदवीधर बाबत आपली भूमिका स्पष्ट केली नाही.परंतु, ऋषिकेश महेंद्र लाड हे आमदार विश्वजीत कदम यांचे नातेवाईक असून त्यांना कॉग्रेसकडून उभे केले जाऊ शकते.
चंद्रकांत पाटील यांनी पुण्यासह पाचही जिल्ह्यात पदवीधर निवडणूकीच्या दृष्टीने मतदार नोंदणी बारीक लक्ष दिले.त्यामुळे भारतीय जनता पक्ष पदवीधरची जागा सोडणार नाही, हे स्पष्ट आहे.परंतु, शरद लाड यांना उमेदवारी दिल्यास पक्षांतर्गत रोष निर्माण होण्याची शक्यता नाकारता येत नाही.शरद लाड हे विद्यमान आमदार अरूण लाड यांचे चिरंजीव आहेत. त्यामुळे या परिस्थितीचा विचार करून इतर पक्ष अधिक ताकद लावत आहेत.तसेच पुण्यातील शिक्षकेतर संघटनेचे नेते शिवाजी खांडेकर यांनी पदवीधर निवडणूक समोर ठेऊन मतदान नोंदणीपासून पाचही जिल्ह्यात भेटी गाठीचा कार्यक्रम सुरू ठेवला आहे. राष्ट्रवादी कॉग्रेस पक्ष शरद पवार गटांकडून टिकीट मिळण्यासाठी खांडेकर प्रयत्नशील आहेत.त्यामुळे सर्वच उमेदवारांच्या बाबत पक्षीय निर्णय काय होणार? याकडे सर्वांचे लक्ष लागले आहे.
