पवई आयआयटीत विद्यार्थ्याची आत्महत्या; परीक्षेत मोबाइल वाचल्याचे उघडकीस

परीक्षेशी संबंधित एका घटनेनंतर आयआयटी बॉम्बेच्या एका विद्यार्थ्याचा मृत्यू झाला. पोलीस या प्रकरणाचा तपास करत आहेत, तर कॅम्पसवरील विद्यार्थ्यांनी मानसिक आरोग्यासाठी अधिक भक्कम आधाराची मागणी केली आहे.

Sep 19, 2026 - 09:58 Updated: Sep 19, 2026 - 11:58

पवई आयआयटीत विद्यार्थ्याची आत्महत्या; परीक्षेत मोबाइल वाचल्याचे उघडकीस

एज्युवार्ता न्यूज नेटवर्क

भारतीय तंत्रज्ञान संस्था (आयआयटी) पवई येथे एनर्जी सायन्स अँड इंजिनिअरिंग विभागातील दुसऱ्या वर्षाच्या एका विद्यार्थ्याने आत्महत्येचा प्रयत्न करून जीव दिला. या दुःखद घटनेनंतर संस्थेच्या परिसरात काही काळ विद्यार्थ्यांनी निदर्शने केली. आत्महत्येचे नेमके कारण अद्याप समजलेले नाही.

मृत विद्यार्थी परीक्षेदरम्यान परीक्षा कक्षात मोबाइल फोन वापरताना आढळून आला होता. त्याने प्रश्नपत्रिका उत्तरे मिळवण्यासाठी चॅटजीपीटीवर अपलोड केली होती. या प्रकरणानंतर संबंधित शिक्षक आणि विभाग प्रमुखांनी त्याच्याशी चर्चा केली. त्यांनी त्याला समुपदेशनही दिले आणि शैक्षणिक कारकिर्दीवर काही विपरीत परिणाम होणार नाही, असे आश्वासन दिले.

चर्चेनंतर विद्यार्थी आपल्या हॉस्टेलमधील खोलीत परतला. त्यानंतर तेथेच त्याने आत्महत्या केली. संस्थेच्या अधिकाऱ्यांनी पोलिसांना माहिती दिली असून चौकशी सुरू आहे. विद्यार्थ्याच्या कुटुंबीयांनाही या दुःखद बातमीची माहिती देण्यात आली आहे.

या घटनेमुळे परिसरात संताप व्यक्त होत आहे. विद्यार्थ्यांनी काही वेळ परिसरात निदर्शने केली आणि प्रशासनाने अधिक संवेदनशीलता दाखवावी, अशी मागणी केली. आयआयटी प्रशासनाने मानसिक आरोग्य सेवा अधिक मजबूत करण्याचे आश्वासन दिले आहे. अशा घटना टाळण्यासाठी विद्यार्थ्यांना वेळोवेळी समुपदेशन उपलब्ध करून देण्याची गरज अधोरेखित झाली आहे.