धर्मेंद्र प्रधान यांच्या राजीनाम्यानंतर नवे शिक्षणमंत्री प्रल्हाद जोशी कोण ?
केंद्रीय मंत्रिमंडळातील कॅबिनेट मंत्री प्रल्हाद जोशी यांच्याकडे त्यांच्या विद्यमान खात्यांसोबत शिक्षण मंत्रालयाचा अतिरिक्त कार्यभार सोपविण्यात आला आहे. सध्या जोशी यांच्याकडे अन्न व ग्राहक व्यवहार मंत्रालयाची जबाबदारी आहे.
Eduvarta
एज्युवार्ता न्यूज नेटवर्क
केंद्रीय शिक्षणमंत्री धर्मेंद्र प्रधान यांनी राजीनामा दिल्यानंतर केंद्र सरकारने महत्त्वाचा निर्णय घेतला आहे. राष्ट्रपतींनी पंतप्रधान नरेंद्र मोदी यांच्या सल्ल्यानुसार धर्मेंद्र प्रधान यांचा केंद्रीय मंत्रिमंडळातील राजीनामा तत्काळ स्वीकारला आहे. तसेच केंद्रीय मंत्रिमंडळातील कॅबिनेट मंत्री प्रल्हाद जोशी यांच्याकडे त्यांच्या विद्यमान खात्यांसोबत शिक्षण मंत्रालयाचा अतिरिक्त कार्यभार सोपविण्यात आला आहे. सध्या जोशी यांच्याकडे अन्न व ग्राहक व्यवहार मंत्रालयाची जबाबदारी असून, त्यासोबत आता शिक्षण मंत्रालयाची धुराही ते सांभाळणार आहेत.
जंतर-मंतर येथे कॉकरोच जनता पार्टी (सीजेपी)च्या आंदोलनाच्या पार्श्वभूमीवर धर्मेंद्र प्रधान यांनी शनिवारी दुपारी पंतप्रधान नरेंद्र मोदी यांच्याकडे राजीनामा सादर केला होता. "राष्ट्रसेवा ही माझ्या जीवनाची सर्वोच्च प्राथमिकता आहे," असे त्यांनी आपल्या राजीनाम्यात म्हटले आहे.
धर्मेंद्र प्रधान यांच्या राजीनाम्यानंतर केंद्र सरकार आणि कॉकरोच जनता पार्टी (सीजेपी)च्या प्रतिनिधींमध्ये आणखी एक बैठक पार पडली. या बैठकीत आंदोलनकर्त्यांच्या विविध मागण्यांवर तत्त्वतः सहमती झाल्याचे सांगण्यात आले. त्यानंतर सीजेपीने आपले आंदोलन मागे घेत असल्याची घोषणा केली.
केंद्रीय मंत्री जे. पी. नड्डा आणि जितेंद्र सिंह यांच्या उपस्थितीत झालेल्या पत्रकार परिषदेत सीजेपीच्या प्रतिनिधींनी सांगितले की, धर्मेंद्र प्रधान यांच्या राजीनाम्याची त्यांची प्रमुख मागणी सरकारने मान्य केली आहे. तसेच उर्वरित मागण्यांबाबतही मंगळवारपर्यंत सकारात्मक निर्णय घेण्याचे आश्वासन सरकारकडून देण्यात आल्याचे त्यांनी सांगितले.
