सावित्रीबाई फुले पुणे विद्यापीठ १०० व्या मराठी साहित्य संमेलनाचे सहसंयोजक

एज्युवार्ता न्यूज नेटवर्क 

शंभराव्या अखिल भारतीय मराठी साहित्य संमेलनाच्या तयारीला वेग आला असून, सावित्रीबाई फुले पुणे विद्यापीठ या ऐतिहासिक संमेलनात सहसंयोजक म्हणून सहभागी होणार आहे.विद्यापीठाच्या व्यवस्थापन परिषदेच्या बैठकीत शनिवारी (दि.25)  रोजी याबाबत निर्णय घेण्यात आला.त्यामुळे संमेलनाला व्यापक स्वरूप मिळणार आहे. 

दरम्यान विद्यापीठ परिसर तसेच संलग्न महाविद्यालयांमध्ये विविध साहित्यिक, सांस्कृतिक, शैक्षणिक उपक्रम, परिसंवाद आणि चर्चासत्रांचे आयोजन करण्यात येणार आहे. २८ ते ३१ जानेवारीदरम्यान पुणे विद्यापीठाच्या शैक्षणिक संकुलात होणारे १०० वे अखिल भारतीय मराठी साहित्य संमेलन प्रत्येक मराठी भाषिकापर्यंत पोहोचविण्याचा आयोजकांचा संकल्प आहे. त्याचाच भाग म्हणून यापूर्वी संमेलन भरलेल्या देशातील विविध ठिकाणी ९९ एकदिवसीय साहित्य संमेलने आयोजित केली जाणार आहेत.

या उपक्रमाच्या नियोजनासाठी रविवारी (२६ जुलै) सावित्रीबाई फुले पुणे विद्यापीठात विशेष कार्यशाळा पार पडली. महाराष्ट्र साहित्य परिषदेच्या विविध शाखांचे प्रतिनिधी, पदाधिकारी आणि आयोजक या कार्यशाळेत सहभागी होणार आहेत.  प्रत्येक ठिकाणचे संमेलन स्थानिक वैशिष्ट्य जपत शंभराव्या साहित्य संमेलनाशी जोडले जाणार आहे.

महाराष्ट्र साहित्य परिषदेचे अध्यक्ष योगेश सोमण यांनी सांगितले की, देशभरातील ९९ साहित्य संमेलनांचे वेळापत्रक, स्थळे आणि कार्यक्रमांची माहिती टप्प्याटप्प्याने जाहीर करण्यात येणार आहे. ही संमेलने १४ ऑगस्ट ते १५ जानेवारी या कालावधीत आयोजित केली जातील.

 साहित्याला लोकचळवळीचे स्वरूप देण्याचा संकल्प

समर्थ युवा फाउंडेशनचे विश्वस्त राजेश पांडे यांनी सांगितले की, शंभरावे अखिल भारतीय मराठी साहित्य संमेलन जगभरातील प्रत्येक मराठी भाषिकापर्यंत पोहोचावे, हा आयोजकांचा उद्देश आहे. विविध बोलीभाषांतील साहित्य मुख्य प्रवाहात आणून ते वाचकांपर्यंत पोहोचविण्याचा प्रयत्न केला जाणार आहे. तरुण, महिला, दलित, कामगार तसेच शिक्षण, आरोग्य, पर्यावरण, आयटी, उद्योग, नाट्य, कला, पत्रकारिता आदी विविध क्षेत्रांना साहित्याशी जोडून या संमेलनाला लोकचळवळीचे स्वरूप देण्याचा मानस असल्याचे त्यांनी स्पष्ट केले.

• २८ ते ३१ जानेवारीदरम्यान पुण्यात १०० वे साहित्य संमेलन
• सावित्रीबाई फुले पुणे विद्यापीठ सहसंयोजक
• देशभरात ९९ एकदिवसीय साहित्य संमेलने
• १४ ऑगस्ट ते १५ जानेवारीदरम्यान संमेलनांची मालिका
• मराठी भाषा, साहित्य व संस्कृती देशभर पोहोचविण्याचा संकल्प