विद्यापीठ अमृत महोत्सवी वर्ष विशेष लोगोचे मुख्यमंत्र्यांच्या हस्ते अनावरण

एज्युवार्ता न्यूज नेटवर्क 

केवळ देशातच नाही तर परदेशातही नाव लौकिक असलेल्या आणि ऑक्सफर्ड ऑफ द इस्ट (oxford of the east) म्हणून ओळखल्या जाणाऱ्या सावित्रीबाई फुले पुणे विद्यापीठाच्या (Savitribai Phule Pune University) अमृत महोत्सवी वर्षानिमित्त विविध कार्यक्रमाचे आयोजन केले जात आहे.अमृत महोत्सवी वर्षानिमित्त एक विशेष लोगो (special logo) तयार करण्यात आला असून या लोगोचे अनावरण गुरूवारी दुपारी मुख्यमंत्री एकनाथ शिंदे (Chief Minister Eknath Shinde) यांच्या हस्ते मंत्रालयात होणार आहे.

हेही वाचा : शिक्षण मोठी बातमी : पुढील वर्षीपासून सर्व शाळांमध्ये ‘एक राज्य एक गणवेश’, शासन निर्णय जारी

 विद्यापीठ यंदा अमृत महोत्सवी वर्ष साजरे करत आहे.त्यानिमित्ताने विविध कार्यक्रमांचे आयोजन करण्यासाठी विद्यापीठाच्या व्यवस्थापन परिषदेचे सदस्य राजेंद्र विखे पाटील यांच्या अध्यक्षतेखाली समिती स्थापन करण्यात आली आहे.या समितीच्या सूचनेनुसार काही दिवसांपूर्वी विद्यापीठात औषधी वनस्पतींची लागवड करण्यात आली.या पुढील काळातही विद्यापीठातर्फे विविध उपक्रम राबविले जाणार आहेत.त्याचाच एक भाग म्हणून अमृत महोत्सवी वर्षानिमित्त लोगो तयार केला आहे.

विद्यापीठातर्फे लोगो तयार करण्यासाठी स्पर्धेचे आयोजन करण्यात आले होते.स्पर्धेसाठी सुमारे १०० लोगो प्राप्त झाले.त्यातील ५ लोगो निवड समितीसमोर ठेवण्यात आले.त्यातून एका लोगोची निवड केली आहे.त्याच लोगोचे अनावरण मुख्यमंत्र्यांच्या हस्ते दुपारी केले जाणार आहे.विजेत्याला ५० हजार रुपयांचे पारितोषिक दिले जाणार आहे.

मुंबई येथे मंत्रालयात मंत्री मंडळाची बैठक पार पडल्यानंतर मुख्यमंत्री एकनाथ शिंदे यांच्या हस्ते या लोगोचे अनावरण होणार आहे. विद्यापीठाचे कुलगुरू डॉ.सुरेश गोसावी, प्र.कुलगुरू डॉ..पराग काळकर, कुलसचिव डॉ. प्रफुल्ल पवार, व्यवस्थापन परिषद सदस्य राजेंद्र विखे पाटील यांच्यासह विद्यापीठ अमृत महोत्सवी वर्ष उत्सव समितीचे सदस्य मंत्रालयात दाखल झाले आहेत.