मोठी बातमी : पुढील वर्षीपासून सर्व शाळांमध्ये ‘एक राज्य एक गणवेश’, शासन निर्णय जारी
२०२४-२५ या शैक्षणिक वर्षापासून मोफत गणवेश योजनेचा लाभ शासनाच्या वतीने सर्व शाळांमध्ये स्थानिक महिला बचत गटांमार्फत शिलाई करुन एकसमान एक रंगाचे दोन गणवेश उपलब्ध करून दिले जाणार आहेत.
Eduvarta
एज्युवार्ता न्यूज नेटवर्क
शालेय शिक्षण विभागाने (School Education Department) राज्यभरातील शासकीय तसेच स्थानिक स्वराज्य संस्थांच्या शाळांमध्ये (School Uniform) पुढील शैक्षणिक वर्षापासून ‘एक राज्य एक गणवेश’ (One State One Uniform) ही योजना राबविण्याचा निर्णय घेतला आहे. इयत्ता पहिली ते आठवीपर्यंतच्या सर्व विद्यार्थ्यांना एकसमान रंगाचे गणवेश शासनाकडून उपलब्ध करून दिले जाणार आहेत. त्यामुळे पुढील वर्षीपासून सर्व शासकीय तसेच स्थानिक स्वराज्य संस्थांच्या शाळांमधील विद्यार्थी एकसमान रंगाच्या गणवेशात दिसतील, यावर शिक्कामोर्तब झाले आहे.
केंद्र शासनाच्या समग्र शिक्षा कार्यक्रमांतर्गत शासकीय तसेच स्थानिक स्वराज्य संस्थांच्या शाळांमधील इ.१ ली ते इ.८ वी मधील शिक्षण घेत असलेल्या सर्व मुली, अनुसूचित जाती व जमाती प्रवर्गातील मुले तसेच दारिद्र्यरेषेखालील पालकांची मुले यांना मोफत गणवेश योजनेचा लाभ देण्यात येतो. तसेच, २०२३-२४ या शैक्षणिक वर्षापासून या योजनेचा लाभ दारिद्र्यरेषेवरील पालकांच्या मुलांनादेखील देण्याचा निर्णय शासनाने यावर्षी घेतला.
विद्यार्थ्यांचे भाषा आणि गणिताचे ज्ञान जाणून घेण्यासाठी विशेष परीक्षा
२०२४-२५ या शैक्षणिक वर्षापासून मोफत गणवेश योजनेचा लाभ शासनाच्या वतीने सर्व शाळांमध्ये स्थानिक महिला बचत गटांमार्फत शिलाई करुन एकसमान एक रंगाचे दोन गणवेश उपलब्ध करून दिले जाणार आहेत. हे गणवेश स्काऊट व गाईड विषयास अनुरूप गणवेशाची रचना असेल. त्यापैकी एका गणवेशाला विद्यार्थ्यांच्या शर्टवरती शोल्डर स्ट्रिप (Shoulder Strip) व दोन खिसे (Double Pocket) असणे आवश्यक आहे.
योजनेंतर्गत राज्यातील पात्र असलेल्या सर्व विद्यार्थ्यांना एक रंग, एक दर्जा असलेला सारख्याच गणवेशाचा लाभ देण्याच्या दृष्टीने कापड खरेदीसाठी ई-निविदा प्रक्रियेचा मसुदा तयार करणे, त्यासाठी आवश्यक त्या विभागांचे मार्गदर्शन घेणे, ई- निविदा प्रक्रिया राबविणे, सर्व संबंधितांचा समन्वय राखणे याकरीता उपाययोजना करणे याची जबाबदारी महाराष्ट्र प्राथमिक शिक्षण परिषदेवर असेल.
गणवेशाच्या शिलाईचे काम स्थानिक महिला बचत गटामार्फत करण्यासाठी महिला आर्थिक विकास महामंडळ यांच्या सहकार्याने केले जाईल. पात्र असणाऱ्या सर्व विद्यार्थ्यांना शासनामार्फत समान रंगाचे दोन गणवेश उपलब्ध करुन देण्यात येणार आहे. त्यानुषंगाने मोफत गणवेश योजनेबाबत संबंधित शाळा तसेच, शाळा व्यवस्थापन समितीमार्फत स्थानिक स्तरावर कोणतीही कार्यवाही करण्यात येऊ नये, असे शिक्षण विभागाने स्पष्ट केले आहे. विद्यार्थ्यांना पहिल्याच दिवशी गणवेश मिळण्यासाठी विभागाकडून प्रयत्न केले जाणार आहेत.
असा असेल गणवेश
मुलांसाठी आकाशी रंगाचा शर्ट आणि गडद निळ्या रंगाची हाफ पँट/ पँट असेल. मुलींना आकाशी रंगाचा शर्ट आणि गडद निळ्या रंगाचा स्कर्ट किंवा ज्या शाळांमध्ये सलवार कमीज असेल तर सलवार गडद निळ्या रंगाची व कमीज आकाशी रंगाची अशा स्वरूपात असेल.
शैक्षणिक बातम्यांचे अपडेट मिळविण्यासाठी व्हॉट्सअप ग्रुपमध्ये सहभागी व्हा.
