SPPU विद्यापीठाला PRN ब्लॉक विद्यार्थ्यांच्या परीक्षेचा मुहूर्त सापडेना; आणखी थोड थांबा.. 

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या (Savitribai Phule Pune University)पीआरएन ब्लॉक (PRN block)विद्यार्थ्यांच्या परीक्षेचा प्रश्न गेल्या काही महिन्यापासून प्रलंबित आहे.विद्यापीठाच्या सर्व अधिकार मंडळातून मंजूरी मिळून तब्बल एक महिना झाला तरीही अद्याप या विद्यार्थ्यांचे परीक्षा अर्ज केव्हा स्वीकारले जाणार, परीक्षा कोणत्या तारखेपासून सुरू होणार याबाबत विद्यापीठाच्या परीक्षा विभागाने (Examination Department)अधिकृत खुलासा केला नाही.त्यामुळे एक ते दोन विषयात अनुत्तीर्ण झाल्याने पदवी मिळण्यापासून दूर असलेल्या विद्यार्थ्यांमध्ये अस्वस्थता आहे.एक लाखापेक्षा जास्त विद्यार्थी विद्यापीठाच्या निर्णयाकडे डोळे लावून बसले आहेत.परंतु, अंतिम निर्णयसाठी आणखी काही दिवस वाट पहावी लागणार असल्याचे विद्यापीठाच्या परीक्षा विभागातील अधिकारी सांगत आहेत. 

विद्यापीठाशी संलग्न पुणे, नाशिक व अहिल्यानगर जिल्ह्यातील अनेक महाविद्यालयातील विद्यार्थी सत्रपूर्तता संपल्यामुळे पदवी पूर्ण करू शकत नाहीत. या विद्यार्थ्यांचे पीआरएन क्रमांक ब्लॉक करण्यात आले आहेत.मात्र, अशा विद्यार्थ्यांना परीक्षेची संधी उपलब्ध करून देता येते.त्यानुसार विद्यापीठाने विद्यार्थ्यांच्या हिताचा निर्णय घेत या विद्यार्थ्यांना परीक्षेची संधी उपलब्ध करून देण्याचा निर्णय घेतला. विद्यापीठाच्या विद्या परिषदेत तसेच व्यवस्थापन्ना परिषदेत याबाबत प्रस्ताव ठेवण्यात आला.त्यास मंजूरी सुध्दा देण्यात आली.त्यामुळे आम्हा सर्व पीआरएन ब्लॉक विद्यार्थ्यांची विद्यापीठाने लवकरात लवकर परीक्षा घ्यावी,अशी मागणी विद्यार्थी करत आहेत.त्यासाठी विद्यापीठाच्या परीक्षा विभागाच्या अधिकाऱ्यांची भेट घेऊन चौकशी करत आहेत.परंतु, विद्यापीठाने यापूर्वी एक पत्रक प्रसिद्ध केले होते. त्यात या विद्यार्थ्यांची परीक्षा स्वतंत्रपणे घेतली जाईल. तसेच त्याबाबतचे निकष व नियमावलीचे पत्रक यथावकाश प्रसिद्ध केले जाईल, असे या पत्रकात नमूद करण्यात आले होते. मात्र, यथावकाश म्हणजे कधी? असा प्रश्न आता विद्यार्थी विचारात आहेत. 

विद्यापीठाने यापूर्वी अनेक वेळा पीआरएन ब्लॉक विद्यार्थ्यांना परीक्षेची संधी उपलब्ध करून दिली आहे. त्यामुळे पुन्हा त्याचा विद्यार्थ्यांना अशा प्रकारची संधी देण्यास विद्यापीठातील अधिकार मंडळातील काही सदस्यांचा विरोध आहे.तसेच नियमांच्या चौकटीत राहून पात्र सत्रपूर्तता पूर्ण झालेल्या विद्यार्थ्यांनाच परीक्षा द्यायला हवी.न्यायालयाकडून त्यावर आक्षेप घेतला जाऊ नये,अशा अनेक बाबी विद्यापीठाकडून तपासल्या जात आहेत.त्यामुळे पीआरएन संदर्भात निर्णय घेण्यास विलंब लागत असल्याचे विद्यापीठाचे अधिकारी सांगत आहेत.परंतु, सर्व प्रक्रिया पूर्ण करण्यात आली असून आणखी दोन ते तीन दिवसात या बाबत विद्यापीठाकडून पत्रक प्रसिद्ध होईल,असेही वरिष्ठ अधिकारी सांगत आहेत. 

दरम्यान, येत्या 15 डिसेंबरपासून पीआरएन ब्लॉक झालेल्या पात्र विद्यार्थ्यांना परीक्षा अर्ज भरण्याची संधी उपलब्ध करून दिली जाईल. तसेच परीक्षेस पात्र असणाऱ्या विद्यार्थ्यांची परीक्षा येत्या जानेवारी महिन्यात घेतली जाईल, असे सूत्रांकडून सांगितले जात आहे. मात्र,परीक्षेस पात्र कोण असणार आणि अपात्र कोण ठरणार हे विद्यापीठाने पत्रक काढल्याशिवाय स्पष्ट होणार नाही.  

पीआरएन ब्लॉक झालेल्या या विद्यार्थ्यांनी 'एज्युवार्ता'शी संवाद 

एलएलबी अभ्यासक्रमाच्या काही विद्यार्थ्यांनी एज्युवार्ताशी संवाद साधला. माझा केवळ एक विषय राहिला आहे.अंतिम वर्षात सनद मिळण्यासाठी अर्ज करता येतो.मात्र, पीआरएन क्रमांक ब्लॉक झाल्याने परीक्षा केव्हा घेतली जाणार याबाबत चिंता वाटते. व्यवस्थापन परिषदेने निर्णय घेतल्यानंतरही परीक्षा का होत नाहीत,असा प्रश्न पडतो,असे एका विद्यार्थ्याने सांगितले. तसेच विद्यापीठाने या पूर्वी पीआरएन ब्लॉक विद्यार्थ्यांना परीक्षेची संधी दिली होती.त्यात दोन सत्रात विषय उत्तीर्ण होण्याची अट घालण्यात आली होती.परंतु, मला एकाच संधी मिळाली. दुसऱ्या सत्रासाठी परीक्षा देता आली नाही. महाविद्यालयाने तुम्हाला दिलेला प्रवेश चुकीचा होता.त्यामुळे तुमचा पीआरएन ब्लॉक झाला असे, विद्यापीठातील अधिकारी सांगत असल्याचे एका विद्यार्थीनीने एज्युवार्ताशी संवाद साधतांना सांगितले.गेल्या 15 ते 20 दिवसांपासून दररोज विद्यार्थी याबाबत आपडेट जाणून घेण्याचा प्रयत्न करत आहेत.