युजीसी पदवीमध्ये विद्यार्थ्यांना देणार कौशल्याधारित अभ्यासक्रमाचे शिक्षण

एज्युवार्ता न्यूज नेटवर्क

पारंपरिक अभ्यासक्रमांबाबत (Traditional curriculum) महत्वाची बातमी समोर आली आहे. विद्यापीठ अनुदान आयोगाने (UGC) पदवीमध्ये विद्यार्थ्यांना ५० टक्के कौशल्यावर आधारित अभ्यासक्रमांचे (Skill-based courses) शिक्षण देण्याच्या उद्देशाने महत्वाचे पाऊल उचलले आहे. याबाबतच्या मार्गदर्शक सूचना लवकरच जाहीर केली जाणार आहे, असेही युजीसीचे माजी अध्यक्ष एम. जगदीश कुमार (Former UGC Chairman M. Jagadish Kumar) यांनी सांगितले.

या अभ्यासक्रमांमध्ये ५० टक्के शिक्षण हे संबंधित विषयाचे दिले जाणार आहे, तर उरलेले ५० टक्के शिक्षण कौशल्याधारित विषयांचे असणार आहे. 

सध्या उद्योग क्षेत्रातून विशिष्ट अभ्यासक्रमांची मागणी केली जात आहे. विद्यार्थ्यांच्या रोजगार क्षमतेसाठी अभ्यासक्रमांमध्ये बदल करण्याचा निर्णय युजीसीने घेतला आहे. त्याचाच भाग म्हणून पदवीलाही ५० टक्के मिळविण्यासाठी कौशल्यवृद्धीचे अभ्यासक्रम पूर्ण करावे लागतील.

देशभरात उच्च शिक्षण घेणाऱ्या साडेचार कोटी विद्यार्थ्यांपैकी ७० टक्के विद्यार्थी हे पारंपरिक बीए, बीकॉम, बीएससी या पदवी अभ्यासक्रमांना प्रवेश घेतात. बदलत्या तंत्रज्ञानाच्या काळात हे अभ्यासक्रम नोकरी मिळवून देण्यासाठी पुरेसे नाही. यामुळे यूजीसीने आता 'इंटिग्रेटेड स्कील्ड कोर्सेस' तयार करण्याचा घेतला आहे, असे एम. जगदीश कुमार यांनी सांगितले.

दरम्यान, एखाद्या विद्यार्थ्याला बीएचा पर्याय निवडून इतिहासात शिक्षण घ्यायचे झाल्यास, त्याच्या पदवी अभ्यासक्रमाच्या पहिल्या दोन वर्षांत त्याला १६० श्रेयांकांपैकी ५० टक्के म्हणजे ८० श्रेयांक एवढे गुण इतिहास विषयात मिळवावे लागतील. तर पुढील दोन वर्षे विविध कौशल्यांचे शिक्षण घेऊन ८० श्रेयांक जमा करू शकेल. त्यामुळे पदवी होताना विद्यार्थ्याकडे विषयासोबतच उद्योगांची गरज असलेल्या कौशल्यांचेही ज्ञान असेल. त्यातून विद्यार्थ्यांची रोजगारक्षमता देखील वाढीला लागणार आहे.