शरद पवारांच्या संस्थेतील महाविद्यालयाचे अजित पवार अध्यक्ष असलेल्या संस्थेकडे हस्तांतरण

एज्युवार्ता न्यूज नेटवर्क

बारामतीतील अँग्रिकल्चरल डेव्हलपमेंट ट्रस्ट (Agricultural Development Trust) संचलित शारदाबाई पवार महिला कला निकेतन (Sharadabai Pawar College) या अनुदानित संस्थेचे व्यवस्थापन हस्तांतरण व स्थलांतरण बारामती (Baramati) तालुक्यातील काऱ्हाटी (Karhati) येथील कृषि उद्योग मूल शिक्षण संस्थेमध्ये (KUMSS) करण्यास राज्य शासनाने मान्यता दिली आहे. माजी केंद्रीय कृषी मंत्री शरद पवार (Sharad Pawar) हे अँग्रिकल्चरल ट्रस्टचे प्रेसिडेंट तर राजेंद्र पवार (Rajendra Pawar) हे चेअरमन आहेत. उपमुख्यमंत्री अजित पवार (Ajit Pawar) हे काऱ्हाटी येथील संस्थेचे अध्यक्ष आहेत. 

उच्च व तंत्र शिक्षण विभागाकडून बुधवारी स्थलांतरणाचा शासन निर्णय जारी करण्यात आला आहे. शासन निर्णयानुसार, शारदानगर येथील शारदाबाई पवार महिला कला निकेतन कला संस्थेचे व्यवस्थापन हस्तांतरण व स्थलांतरण कृषि उद्योग मूल शिक्षण संस्थेकडे करण्यास धर्मादाय आयुक्तानी मान्यता दिलेली आहे. धर्मादाय आयुक्तांनी दिलेली मान्यता, निरिक्षक कार्यालयाचे अभिप्राय, टास्क फोर्स समितीची शिफारस व कला संचालनालयाने केलेल्या  विनंतीला अनुसरून कला संस्थेचे व्यवस्थापन हस्तांतरण व स्थलांतरण करण्यास मान्यता देण्यात आली आहे.

व्यवस्थापन कोटा ठरतोय भ्रष्टाचाराचे कुरण? अधिष्ठाताच लाचप्रकरणी सापळ्यात अडकल्याने खळबळ

शारदाबाई पवार महिला कला निकेतन ही अनुदानित कला संस्था शैक्षणिक वर्ष २०२३-२४ पासून शारदाबाई पवार कला महाविद्यालय या नावाने चालविण्यात येणार आहे. ही नियोजित कला संस्था काऱ्हाटी या ठिकाणी २०२३-२४ पासून चालविण्यास मान्यता देण्यात आली आहे. संस्थेत मुलभूत अभ्यासक्रम (१ वर्ष) व आर्ट टिचर डिप्लोमा (२ वर्षे) हे पदविका अभ्यासक्रम शैक्षणिक वर्ष २०२३-२४ पासून सुरु होतील, असे शासन निर्णयातील नमूद करण्यात आले आहे.

शारदाबाई पवार महिला कलानिकेतन या कला संस्थेतील संस्थेने कला संचालनालयाच्या मान्यतेने नियुक्त केलेल्या सर्व स्थायी/अस्थायी शिक्षक व शिक्षकेतर कर्मचारी त्यांच्या सेवाविषयक व शैक्षणिक तसेच इतर तदनुषंगिक बाबींसह शारदाबाई पवार कला महाविद्यालय या नियोजित कला संस्थेत २०२३-२४ पासून हस्तांतरीत करण्यास मान्यता देण्यात आली आहे.

दरम्यान, बारामतीतील शारदानगर येथील अँग्रिकल्चरल डेव्हलपमेंट ट्रस्टचे प्रेसिडेंट शरद पवार असून राजेंद्र पवार हे चेअरमन आहेत. राजेंद्र पवार हे आमदार रोहित पवार यांचे वडील आहेत. ट्रस्टच्या मंडळामध्ये खासदार सुप्रिया सुळे विश्वस्त आहेत. तर काऱ्हाटी येथील संस्थेचे अध्यक्ष अजित पवार आहेत. या संस्थेच्या मंडळात त्यांच्या पत्नी सुनेत्रा पवार विश्वस्त आहेत.

शैक्षणिक बातम्यांचे अपडेट मिळविण्यासाठी व्हॉट्सअप ग्रुपमध्ये सहभागी व्हा.

https://chat.whatsapp.com/KjPbd0AYSAKB5Pt2g9yIHo