TET परीक्षा अंतिम निकालाचा मुहूर्त सापडला; निकालाची तयारी पूर्ण
पुढील दोन दिवसात म्हणजेच सोमवारी 2 फेब्रुवारी किंवा मंगळवारी 3 फेब्रुवारी रोजी निकाल जाहीर होणार असल्याने आपण उत्तीर्ण झालो किंवा नाही, हे सर्व उमेदवारांना समजणार आहे.
eduvarta@gmail.com 
एज्युवार्ता न्यूज नेटवर्क
महाराष्ट्र राज्य परीक्षा परिषदेतर्फे (Maharashtra State Examination Council)घेण्यात आलेल्या शिक्षक पात्रता परीक्षा (Teacher Eligibility Test -TET)अर्थात टीईटी परीक्षेचा अंतिम निकाल (TET exam final result)उमेदवारांना पाहण्यासाठी उपलब्ध करून देण्यात आला. मात्र अंतिम निकाल केव्हा लागणार याबाबत उमेदवारांमध्ये मोठी उत्सुकता होती. फेब्रुवारी महिन्याच्या पहिल्या आठवड्यात टीईटी परीक्षेचा निकाल जाहीर होणार आहे. दोन किंवा तीन फेब्रुवारी २०२६ रोजी निकाल जाहीर होणार असल्याचे परीक्षा परिषदेतील अत्यंत विश्वासनीय सूत्रांनी सांगितले.
सर्वोच्च न्यायालयाच्या निर्णयानंतर सर्वच शिक्षकांना टीईटी परीक्षा बंधनकारक करण्यात आली. त्यामुळे 23 नोव्हेंबर 2025 रोजी घेण्यात आलेल्या टीईटी परीक्षेस प्रविष्ट होणाऱ्या उमेदवारांची संख्या चांगलीच वाढली. या परीक्षेसाठी राज्यभरातील 4 लाख 75 हजार 668 उमेदवारांनी नोंदणी केली होती. राज्यातील 1420 परीक्षा केंद्रांवर या उमेदवारांची परीक्षा घेण्यात आली. परीक्षेची उत्तरसूची जाहीर करण्यात आली. त्यानंतर उमेदवारांना त्यांच्या लॉगिनमध्ये अंतरिम निकाल पाहण्यासाठी उपलब्ध करून देण्यात आला. गेल्या वर्षीच्या तुलनेत यंदा परीक्षेचा निकालात सुमारे दहा टक्क्यांपर्यंत वाढ झाली. मात्र त्यात आणखी वाढ होण्याची शक्यता आहे.
दरम्यान, सीटीईटी परीक्षा जिल्हा परिषद निवडणुकांच्या प्रशिक्षणाच्या दिवशी येत असल्याने सीटीईटी परीक्षा पुढे ढकलावी, अशी मागणी केली जात आहे. तर सीटीईटी परीक्षेपूर्वी टीईटी परीक्षेचा निकाल जाहीर करावा, अशी अपेक्षा उमेदवारांकडून व्यक्त केली जात आहे. त्यानुसार परीक्षा परिषदेने टीईटी परीक्षेच्या अंतिम निकालाची तयारी पूर्ण केली आहे. प्रश्नपत्रिकेतील काही प्रश्न चुकल्यामुळे संबंधित प्रश्नांचा गुण वजा करून उमेदवारांचा निकाल जाहीर केला जाणार आहे. त्यामुळे निकाला जाहीर करण्याच्या गुणोत्तरात बदल होणार आहे. त्याचप्रमाणे उमेदवार 82 गुणांना उत्तीर्ण असेल की 83 गुणांना उत्तीर्ण असेल, यावरही अंतिम निर्णय घेण्यात आला आहे. 82 गुणांना उमेदवार उत्तीर्ण होईल, अशी शक्यता व्यक्त केली जात आहे.
सर्वोच्च न्यायालयाच्या निर्णयामुळे शिक्षकांना नोकरी टिकवण्यासाठी तसेच पदोन्नतीसाठी टीईटी परीक्षा उत्तीरण होणे आवश्यक आहे.त्यामुळे टीईटी परीक्षेत उत्तीर्ण होण्यासाठी सेवेत कार्यरत असणारे सर्वच शिक्षक प्रयत्न करत आहेत. परीक्षा परिषदेकडून टीईटी परीक्षेचा अंतिम निकाल केव्हा लागणार याची वाट सर्व उमेदवार पाहत आहेत. पुढील दोन दिवसात म्हणजेच सोमवारी 2 फेब्रुवारी किंबया मंगळवारी 3 फेब्रुवारी रोजी निकाल जाहीर होणार असल्याने आपण उत्तीर्ण झालो किंवा नाही, हे सर्व उमेदवारांना समजणार आहे.
