होमिओपॅथी अभ्यासक्रमाच्या (B.H.M.S) प्रवेशासाठी कट-ऑफची मर्यादा झाली कमी

एज्युवार्ता न्यूज नेटवर्क 

आयुष पदवी अभ्यासक्रमांना (AYUSH Degree Courses) प्रवेश घेण्यासाठी विद्यार्थ्यांनी नीट परीक्षेत किमान ५० पर्सेटाइल मिळवणे आवश्यक असते. मात्र,  आयुर्वेद, होमिओपॅथी व युनानी अभ्यासक्रमाच्या (Ayurveda, Homeopathy and Unani courses) नियमित व मुक्त फेऱ्यांनंतरही अनेक राज्यांमध्ये जागा रिक्त राहिल्या आहेत. त्यामुळे आयुष मंत्रालयाने तिन्ही अभ्यासक्रमांच्या प्रवेश प्रक्रियेसाठी आवश्यक पात्रता असलेल्या ५० पर्सेटाइलची मर्यादा ३५ पर्सेटाइल किंवा ११२ गुणांपर्यंत (The cut-off limit has been reduced) कमी केली आहे. आरक्षित प्रवर्गासाठी ही मर्यादा २५ पर्सेटाइल किंवा ८७ गुणांपर्यंत तसेच दिव्यांग विद्यार्थ्यांसाठी ही मर्यादा ३० पर्सेटाइल किंवा ९९ गुणांपर्यंत कमी करण्यात आली आहे. पात्रता निकष शिथिल करण्यामुळे नीट परीक्षेत ३५ पर्सेटाइल मिळालेल्या विद्यार्थ्यांना प्रवेश घेण्याची संधी उपलब्ध होणार आहे.

होमिओपॅथी अभ्यासक्रमाच्या प्रवेशाच्या नीट परीक्षेतील पर्सेंटाइल कमी करण्याचा निर्णय राष्ट्रीय होमिओपॅथी आयोगाने घेतल्यानंतर आयुष मंत्रालयानेही आयुर्वेद, होमिओपॅथी व युनानी अभ्यासक्रमांच्या प्रवेशासाठी आवश्यक गुणांची पात्रता १५ पर्सेंटाइलने शिथिल करण्याचा निर्णय घेतला आहे. त्यानुसार राज्य सामाईक प्रवेश परीक्षा कक्षाने तिसरी मुक्त फेरी रद्द करून नव्याने पात्र ठरणार्‍या विद्यार्थ्यांसाठी प्रवेश प्रक्रियेचे सुधारित वेळापत्रक जाहीर केले आहे.

प्रवेश प्रक्रियेचे वेळापत्रक

नव्याने नोंदणी केलेल्या विद्यार्थ्यांसह सर्व विद्यार्थ्यांची २२ नोव्हेंबर रोजी गुणवत्ता यादी, तसेच जागांचा तपशील जाहीर करण्यात येईल. २३ ते २४ नोव्हेंबरदरम्यान विद्यार्थ्यांना महाविद्यालयांचा पसंतीक्रम भरता येणार आहे. ज्या विद्यार्थ्यांनी पहिल्या मुक्त फेरीमध्ये पसंतीक्रम भरले आहेत. त्यांनाही पुन्हा पसंतीक्रम भरावे लागणार आहेत. तिसऱ्या मुक्त फेरीसाठी २६ नोव्हेंबर रोजी निवड यादी जाहीर केली जाईल. निवड झालेल्या विद्यार्थ्यांना २७ ते ३० नोव्हेंबर दरम्यान सायंकाळी ५:३० वाजेपर्यंत महाविद्यालयात जाऊन प्रवेश घ्यायचा आहे.