निलंबित मुख्याध्यापिका, संस्थाचालकांनी लावले शाळेला पहिल्या दिवशी कुलूप; विद्यार्थी शिक्षक वर्गाबाहेर, गुन्हा दाखल

एज्युवार्ता न्यूज नेटवर्क 

पुण्यातील कात्रज कोंढवा रस्त्यावरील मुनोत माध्यमिक शाळेवर प्रशासकांची नियुक्ती करण्यात आली. मात्र, या प्रशासकाला न जुमानता शाळेच्या निलंबित मुख्याध्यापिका आणि संस्थाचालकांनी शाळेच्या पहिल्याच दिवशी ही शाळा कायमची बंद करण्यात आली असल्याचा बोर्ड शाळेसमोर लावला. त्यामुळे विद्यार्थी व बालकांमध्ये एकच गोंधळ निर्माण झाला. त्यावर संबंधित मुख्याध्यापिका व संस्थाचालक यांच्या विरोधात पोलिसांकडे गुन्हा दाखल करण्यात आला आहे. 

शाळेचे प्रशासक सुनील गच्चे यांनी संस्थाचालक व निलंबित मुख्याध्यापिका यांच्या विरोधात पोलिसांकडे तक्रार दिली असून पोलिसांनी शाळेचे संस्थापक अध्यक्ष अशोक मुनोत त्यांची मुलगी हर्षदा मुनोत व त्यांचा मुलगा निखिल मुनोत आणि निलंबित मुख्याध्यापिका सुरेखा सुतार यांच्यावर गुन्हा दाखल केला आहे. मात्र, या घटनेमुळे संस्थाचालक व मुख्याध्यापिका विद्यार्थ्यांना शाळेच्या पहिल्या दिवशी वर्गात येऊ देत नसल्याने आश्चर्य व्यक्त केले जात आहे.

पोलिसांनी दिलेल्या माहितीनुसार,कात्रज परिसरातील स्वर्गीय अंबरचंदजी मुनोत शिक्षण संस्था संचालित सौ.झुंबरबाई मुनोत माध्यमिक विद्यालय या शाळेवर राज्य शासनाने उप शिक्षणाधिकारी सुनील गच्चे यांची प्रशासक म्हणून नियुक्ती केली. परंतु, प्रशासक म्हणून पदभार घेण्यास गेले असता गच्चे यांना संस्थेचे संस्थापक अध्यक्ष अशोक मुनोत तसेच माध्यमिक शाळेच्या मुख्याध्यापिका सुरेखा सुतार यांनी प्रशासक म्हणून आदेश मान्य करणार नसल्याचे सांगितले. तसेच त्यांना शाळेतून परत पाठवून दिले.

 दरम्यानच्या काळात शाळेच्या मुख्याध्यापिका सुरेखा सुतार या प्रशासकीय कामात कोणतेही सहकार्य करीत नसल्यामुळे त्यांना कारणे दाखवा नोटीस देऊन निलंबित करण्यात आले. परंतु, 16 जून रोजी 2025- 26 या शैक्षणिक वर्षाचा शाळेचा पहिला दिवस होता. मुनोत माध्यमिक शाळेत इयत्ता आठवी ते दहावीच्या वर्गातील एकूण 179 विद्यार्थी शिक्षण घेतात. मात्र, या शाळेत प्रवेश देण्यास संस्थेच्या मुख्याध्यापिका व संस्थाचालकांनी अटकाव केला. शाळेचे संस्थापक अध्यक्ष अशोक मुनोत त्यांची मुलगी हर्षदा मुनोत व त्यांचा मुलगा निखिल मुनोत यांनी शाळेच्या प्रवेशद्वारावर व शाळेच्या कार्यालयास व सर्व वर्ग खोल्यास कुलूप लावून ठेवले. त्याचप्रमाणे शाळेच्या गेटवर फ्लेक्स लावून ही शाळा कायमची बंद करण्यात आली आहे, असे सांगून विद्यार्थी पालक व शिक्षकांना शाळेत प्रवेश दिला नाही.

शाळेत घडलेला प्रकार समजतात प्रशासक गच्चे उपशिक्षण संचालक सुनंदा वाखारे माध्यमिक शिक्षणाधिकारी भाऊसाहेब कार्यकर उपशिक्षणाधिकारी महिंद्रकर मॅडम , पालिकेचे उप प्रशासकीय अधिकारी धनंजय परदेशी, सह प्रशासकीय अधिकारी शंकर मांडवे, जयेश शेंडकर हे सर्व दुपारी बारा वाजता शाळेच्या गेटवर जमा झाले. सर्वांनी शाळेचे संस्थाचालक व मुख्याध्यापिका यांनी बेकायदेशीर वागू नये, अशी विनंती केली. मात्र, शाळेच्या प्रशासक व मुख्याध्यापिका यांनी ऐकून न घेता शाळेचे कुलूप उघडले नाही.

गच्चे हे शाळेचे प्रशासक असताना शैक्षणिक वर्षाच्या पहिल्या दिवशी संस्थाचालक व निलंबित मुख्याध्यापिका यांनी कोणताही कायदेशीर अधिकार नाही. तरीही मुनोत शाळेच्या मुख्य प्रवेशद्वारावर शाळेस व वर्ग खोल्यांना कुलूप लावून विद्यार्थी व शिक्षकांना शाळेच्या आत प्रवेश करण्यास अटकाव केला. तसेच शाळेत प्रवेस करू न दिल्यामुळे आणि शासकीय कामात अडथळा निर्माण केल्यामुळे संबंधित संस्थाचालक व मुख्याध्यापिका विरोधात गच्चे यांनी पोलिसांकडे तक्रार दिली. याप्रकरणी भारतीय विद्यापीठ पोलीस ठाण्याच्या सहाय्यक निरीक्षक स्नेहल थोरात तपास अधिकारी म्हणून काम पाहत आहेत.