नाशिक कुंभमेळ्यातील सहभागासाठी विद्यार्थ्यांना अकॅडेमिक क्रेडिट देण्याची मागणी
. या महोत्सवात विद्यार्थ्यांची विविध कार्यक्षेत्रांमध्ये जसे की, वाहतूक नियंत्रण, गर्दी व्यवस्थापन ,आरोग्य सेवा , सीसीटीव्ही नियंत्रण, माहिती तंत्रज्ञान, NCC, NSS, संशोधन, सुरक्षा, पर्यावरण, नदी संवर्धन आदी अनेक व्यवस्थापकीय कार्ये यात मदत घेता येईल. किंबहुना यापूर्वीच्या कुंभमेळ्यात स्वंयस्फूर्तीने विद्यार्थी शिक्षक घटकांनी असे योगदान दिलेलेही आहे.
eduvarta@gmail.com 
एज्युवार्त न्यूज नेटवर्क
राष्ट्रीय शैक्षणिक धोरण 2020 च्या (National Education Policy 2020) दिशादर्शक तत्वांनुसार, कुंभमेळ्यात स्वयंसेवक म्हणून मदत करणाऱ्या विद्यार्थ्यांना सामाजिक कार्यासाठीच्या क्रेडिट प्रणालीचा वापर करून अकॅडेमिक क्रेडिट (Academic credit) देण्यात यावे. यासंबंधीचा ठराव आगामी अकॅडमिक कौन्सिलच्या बैठकीत घ्यावा अशी मागणी सावित्रीबाई फुले पुणे विद्यापीठाचे (Savitribai Phule Pune University) व्यवस्थापन परिषद सदस्य सागर वैद्य (Sagar Vaidya) यांनी विद्यापीठाकडे केली आहे. यासंबंधीचे निवेदन वैद्य यांनी कुलगुरू डॉ. सुरेश गोसावी (Vice Chancellor Dr. Suresh Gosavi) यांना दिले आहे.
नाशिक येथे २०२६-२७ दरम्यान कुंभमेळ्याचे आयोजन करण्यात आले आहे. कुंभमेळा हा दर बारा वर्षांनी येणारा एक राष्ट्रीय स्तरावरील भव्य धार्मिक आणि सांस्कृतिक सोहळा असून, या सोहळ्यास लाखो भाविक देशभरातून तसेच परदेशातूनही भेट देतात. या महोत्सवात विद्यार्थ्यांची विविध कार्यक्षेत्रांमध्ये जसे की, वाहतूक नियंत्रण, गर्दी व्यवस्थापन ,आरोग्य सेवा , सीसीटीव्ही नियंत्रण, माहिती तंत्रज्ञान, NCC, NSS, संशोधन, सुरक्षा, पर्यावरण, नदी संवर्धन आदी अनेक व्यवस्थापकीय कार्ये यात मदत घेता येईल. किंबहुना यापूर्वीच्या कुंभमेळ्यात स्वंयस्फूर्तीने विद्यार्थी शिक्षक घटकांनी असे योगदान दिलेलेही आहे.
विद्यार्थ्यांच्या या सहभागामुळे प्रशासनाला आवश्यक मनुष्यबळ उपलब्ध होईल. त्याचबरोबर, विद्यार्थ्यांना नागरी शिस्त, संरक्षण, आपत्ती व्यवस्थापन, आणि सामाजिक जबाबदारी यासारख्या क्षेत्रातील प्रत्यक्ष अनुभव मिळेल. अशा प्रकारच्या अनुभवामुळे विद्यार्थ्यांचा सर्वांगीण विकास होण्यास मदत होईल. नाशिकचे पोलिस आयुक्त संदीप कर्णिक यांनी यासाठी कौतुकास्पद पुढाकार घेऊन शैक्षणिक समन्वय समिती देखील या कामासाठी स्थापन करण्यात आली आहे. पोलिस प्रशासनानेही विद्यापीठाला यासंबधीचे पत्र पाठवले आहे.
त्या अनुषंगाने विद्यापीठाने, नाशिक कुंभमेळ्यामध्ये सामाजिक कार्यात सहभागी होणाऱ्या विद्यार्थ्यांना त्यांच्या कार्याच्या स्वरूपानुसार अकॅडमिक क्रेडिट्स प्रदान करावे जेणेकरून NEP चा यथोचित उद्देशही सफल होईल आणि विद्यार्थ्यांसाठी हा केवळ धार्मिक उत्सवातील सहभाग न राहता शैक्षणिक उपक्रमही ठरून त्यांच्या ज्ञान परंपरेत वाढ होईल. शिक्षक, शैक्षणिक संस्था यांनाही याचा मूल्यांकन वाढीसाठी उपयोग होईल. तरी याबाबत आपण योग्य ती कार्यवाही व्हावी, अशी विनंती वैद्य यांनी विद्यापीठाला केली आहे.
