सीएचबी धारकांचे मानधन मिळेपर्यंत प्राचार्यांचे वेतन थांबवा
ऑक्टोंबर व नोव्हेंबर महिन्याच्या C.H.B मानधनाच्या कॅम्पमध्ये प्राचार्यांनी वेळेत मानधन प्रस्ताव सादर न केल्यामुळे C.H.B धारकांना मानधनाची प्रतीक्षा करावी लागणार आहे.
eduvarta@gmail.com 
एज्युवार्ता न्यूज नेटवर्क
सीएसबी (CHB)धारकांना तुटपुंजा मानधनावर काम करावे लागत आहे.त्यात अनेक महाविद्यालयांच्या प्राचार्यांकडून (Principals of colleges) सीएचबी धारकांच्या मानधनाचे प्रस्ताव उच्च शिक्षण सहसंचालक कार्यालयाकडे (Office of the Joint Director of Higher Education)सादर केले जात नाहीत. त्यामुळे सहसंचालक कार्यालयाच्या आदेशाचे पालन न करणाऱ्या प्राचार्यांचे वेतन सीएचबी धारकांचे मानधन (Remuneration of CHB holders) मिळेपर्यंत थांबविण्यात यावे, अशी मागणी महाराष्ट्र नवप्राध्यापक संघटनेतर्फे (Maharashtra New Professors Association)करण्यात आली आहे.
कोल्हापूर सहसंचालक कार्यालयाने आयोजित केलेल्या ऑक्टोंबर व नोव्हेंबर महिन्याच्या C.H.B मानधनाच्या कॅम्पमध्ये प्राचार्यांनी वेळेत मानधन प्रस्ताव सादर न केल्यामुळे C.H.B धारकांना मानधनाची प्रतीक्षा करावी लागणार आहे. शासन परिपत्रक व सहसंचालकांनी दिलेल्या आदेशाचे पालन अनेक प्राचार्य करीत नाही ही शोकांतीका आहे,असे निवेदन राज्याचे उच्च शिक्षण संचालक डॉ.शैलेंद्र देवळाणकर यांना नवप्राध्यापक संघटनेतर्फे देण्यात आले आहे.
शासन आदेशाचे व सहसंचालक यांच्या आदेशाचे पालन न करणाऱ्या प्राचार्यांचे वेतन C.H.B धारकांचे मानधन मिळेपर्यंत तात्काळ थांबवण्यात यावे. प्राचार्यांच्या हलगर्जिपनामुळे व नाकर्तेपणामुळे C.H.B धारकांना आर्थिक व मानसिक त्रास सहन करावा लागणार आहे. या त्रासामुळे जर कोणी आत्महत्येचे पाऊल उचलले तर त्यास व्यवस्था कारणीभूत ठरेल, याची जाणीव असावी. या अगोदर सहसंचालक पदावर कार्यरत असलेले हेमंत कटारे व उबाळे सर नेहमी C.H.B धारकांच्या पाठीशी उभे राहिलेल्या होते. परंतू सध्याचे अधिकारी CHB प्राध्यापकांच्या वेतनाबद्दल गंभीर नाहीत.त्यामुळे तासिका तत्वावरिल प्राध्यापकांना न्याय देऊन सहकार्य करावे,अशी मागणी महाराष्ट्र नवप्राध्यापक संघटनेचे अध्यक्ष संदीप पाथ्रीकर यांनी निवेदनाद्वारे केली आहे.
