पुणे : शालेय बसचे ऑडिट करा; आमदार शिरोळे यांचा विधानसभेत पवित्रा 

एज्युवार्ता न्यूज नेटवर्क 

पुणे शहरात सतत होणारे (Pune City School Bus) अपघात रोखण्यासाठी आणि विद्यार्थ्यांच्या सुरक्षिततेसाठी शालेय बसचे ऑडिट (School bus audit) त्वरीत करण्यात यावे. तसेच अपात्कालिक घटनेवेळी सुरक्षित बाहेर पडण्यासाठी शालेय कर्मचाऱ्यांना आग प्रतिबंधक प्रशिक्षण देण्यात यावे, असा पवित्रा पुण्यातील शिवाजीनगर विधानसभेचे आमदार सिद्धार्थ शिरोळे (MLA Siddharth Shirole) यांनी विधानसभेत बोलताना घेतला. 

संकटकालीन औचित्याचा मुद्दा उपस्थित करून शिरोळे यांनी पुण्यातील शालेय बस ऑडिट करण्याचा मुद्दा सरकार दरबारी मांडला. त्यांच्या या मागणीला किती प्रतिसाद मिळतो हे येत्या काळात पाहायला मिळेल. पुणे शहरातील खराडी परिसरात नुकतीच १५ ते २० विद्यार्थ्यांना घेऊन जाणाऱ्या स्कूल बसला आग लागल्याची धक्कादायक घटना घडली होती. ही घटना पाहता शाळेत जाणाऱ्या विद्यार्थ्यांच्या सुरक्षिततेचा मुद्दा पुन्हा एकदा ऐरणीवर आला आहे, असे शिरोळे यांनी बोलताना सांगितले.

एकट्या पुणे जिल्ह्यात ८ हजारहून अधिक शालेय बस रोज विद्यार्थ्यांची ने-आन करत आहेत. या सर्व बसगाड्यांचे आणि व्हॅन्स चे ऑडिट होणे गरजेचे आहे. शालेय बस गाडीला आग लागल्यास कोणत्या उपाययोजना करायच्या? याचे प्रशिक्षण पुणे महापालिकेच्या अग्निशमन विभागाकडून दिले जावे. तसेच बस गाडीमध्ये आग विझवणारी यंत्रणा किती असावी? कुठे बसवली जावी? त्याचा वापर कसा केला जावा? विद्यार्थ्यांना सुरक्षितपणे बाहेर कसे काढावे? याचे प्रशिक्षण शालेय कर्मचाऱ्यांना देण्यात यावे याकरिता सरकारने महापालिकांना निर्देश द्यावेत, अशी मागणी आमदार सिद्धार्थ शिरोळे यांनी केली आहे.
_____________________________________

प्रत्येक शाळेत असलेल्या वाहतूक समित्याने स्कुल बसचे व्हेरिफिकेशन केले पाहिजे. तसेच 'आरटीओ'ने शैक्षणिक वर्ष सुरू होण्यापूर्वी सर्व स्कूल बसची तपासणी करणे आवश्यक आहे. आरटीओ कार्यालयाने दिलेले फिटनेस सर्टिफिकट पाहिल्याशिवाय संबंधित स्कूल बस शाळांनी विद्यार्थी वाहतुकीसाठी परवानगी देऊ नये. 

- दिलीप सिंग विश्वकर्मा, महापेरेंट्स पालक संघटना