धक्कादायक: BJ मेडिकल कॉलेजचा विद्यार्थी १४ दिवसांपासून बेपत्ता; पालकांचे गंभीर आरोप
पुण्यातील नामांकित बी. जे. मेडिकल कॉलेजमध्ये रॅगिंगच्या मानसिक त्रासाला कंटाळून प्रथम वर्षाचा एमबीबीएस विद्यार्थी तन्मय अजयकुमार वंगे गेले १४ दिवस बेपत्ता आहे. या घटनेमुळे महाविद्यालयीन वसतिगृह आणि पुणे शहरात खळबळ उडाली आहे.
Eduvarta
एज्युवार्ता न्यूज नेटवर्क
पुण्यातील नामांकित बी. जे. मेडिकल कॉलेजमध्ये (Pune Medical College student missing) रॅगिंगच्या मानसिक त्रासाला कंटाळून प्रथम वर्षाचा एमबीबीएस विद्यार्थी तन्मय अजयकुमार वंगे (Tanmay Ajaykumar Vange) गेले १४ दिवस बेपत्ता आहे. या घटनेमुळे महाविद्यालयीन वसतिगृह आणि पुणे शहरात खळबळ उडाली आहे. तन्मय मुळचा कोल्हापूर जिल्ह्यातील असून तो महाविद्यालयाच्या वसतिगृहात राहत होता. पालकांच्या म्हणण्यानुसार, तो पुणे रेल्वे स्टेशनवरून निघून गेल्याची शक्यता आहे. खराडी पोलिस ठाण्यात याबाबत तक्रार (Kharadi Police Missing Person Case) दाखल करण्यात आली असून पोलिस त्याचा शोध घेत आहेत.
तन्मयने आपल्या पालकांना कॉलेजमधील स्थानिक विद्यार्थ्यांच्या ग्रुपकडून होणाऱ्या रॅगिंगबद्दल वारंवार तक्रार केली होती. त्याच्या बॅचमधील उत्कर्ष सिंग, श्रेया यादव आणि त्यांच्या साथीदारांकडून मानसिक छळ, अपमानास्पद वागणूक, टोमणे मारणे आणि सतत चिडवणे असे प्रकार सुरू होते. या त्रासामुळे तन्मयने वसतिगृह सोडण्याचा निर्णय घेतला. पालकांनी सांगितले की, मुलाने कोणालाही काहीही न सांगता महाविद्यालय आणि वसतिगृह सोडले. त्यामुळे कुटुंबीय अत्यंत चिंतेत आहेत.
पालकांनी खराडी पोलिसांकडे दिलेल्या तक्रारीत स्पष्ट म्हटले आहे की, रॅगिंगमुळे त्रास सहन न होऊन तन्मय बेपत्ता झाला आहे. त्यांनी दोषी विद्यार्थ्यांवर तात्काळ गुन्हा दाखल करण्याची आणि योग्य तपास करण्याची मागणी केली आहे. पोलिस या प्रकरणाचा गांभीर्याने विचार करत असून, विद्यार्थ्याच्या मोबाइल लोकेशन, सीसीटीव्ही फुटेज आणि रेल्वे स्टेशन परिसरातील माहितीवरून शोध मोहीम सुरू केली आहे.
बी. जे. मेडिकल कॉलेज प्रशासनाकडून मात्र या प्रकरणात समाधानकारक माहिती उपलब्ध होत नसल्याचे पालकांचे म्हणणे आहे. रॅगिंग रोखण्यासाठी महाविद्यालयाने काय उपाययोजना केल्या, याबाबतही स्पष्टता नाही. या घटनेमुळे इतर विद्यार्थ्यांमध्येही भीतीचे वातावरण निर्माण झाले आहे. अनेक पालक आपल्या मुलांच्या सुरक्षिततेबाबत चिंता व्यक्त करत आहेत.
शिक्षण क्षेत्रात रॅगिंग हा सतत चर्चेत असलेला विषय आहे. कायद्यानुसार रॅगिंग पूर्णपणे बंद असतानाही काही विद्यार्थी गटांकडून असे प्रकार सुरू असल्याचे समोर येत आहे. तन्मय लवकरात लवकर सुरक्षितपणे सापडावा आणि दोषींवर कठोर कारवाई व्हावी, अशी मागणी आता पुणे शहरातून होत आहे. पोलिस तपासात लवकरच प्रगती होईल, अशी अपेक्षा व्यक्त केली जात आहे.
