स्वर्गीय अजितदादा पवार यांना SPPU विद्यापीठातर्फे जीवनसाधना गौरव पुरस्कार
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठातर्फे दिल्या जाणाऱ्या जीवनसधना गौरव पुरस्काराची घोषणा करण्यात आली आहे. विद्यापीठातर्फे सामाजिक आणि राजकीय क्षेत्रामधील योगदानाबद्दल माजी उपमुख्यमंत्री स्वर्गीय माननीय नामदार अजितदादा पवार, व्यापार आणि उद्योग क्षेत्रामधील योगदानाबद्दल पद्मश्री डॉ.अशोक खाडे; सहकार क्षेत्रामधील योगदानाबद्दल अप्पासाहेब दादाबा राजळे , शिक्षण क्षेत्रातील योगदानाबद्दल प्रा. डॉ. पंडित विद्यासागर आणि कला क्षेत्रातील योगदानाबद्दल शमा भाटे यांना यावर्षीचा जीवनसाधना गौरव पुरस्कार घोषित करण्यात येत आहे, असे विद्यापीठातर्फे कळविण्यात आले आहे.
सावित्रीबाई फुले पुणे विद्यापीठाचा ७७ वा वर्धापनदिन येत्या १० फेब्रुवारी रोजी सकाळी १०.३० वाजता इरावती कर्वे सामाजिक शास्त्र संकुलातील स्वराज्यरक्षक धर्मवीर छत्रपती संभाजी महाराज सभागृहात संपन्न होत असून ज्येष्ठ शास्त्रज्ञ पद्मविभूषण डॉ. रघुनाथ माशेलकर हे या समारंभाचे प्रमुख अतिथी आहेत. त्यांच्या शुभहस्ते सर्व सन्माननीयांच्या उपस्थितीत मान्यवर व्यक्तींना यावर्षीचे जीवनसाधना गौरव पुरस्कार प्रदान केले जाणार आहेत. कुलगुरू प्रा. डॉ. सुरेश गोसावी, हे या समारंभाचे अध्यक्ष आहेत.
विद्यापीठाच्या वर्धापन दिनानिमित्त दरवर्षी विविध क्षेत्रात समग्र कार्यकाळात उल्लेखनीय कामगिरी बजावणाऱ्या व्यक्तींना जीवनसाधना गौरव पुरस्काराने सन्मानित करण्यात येते. अतिशय प्रतिष्ठेच्या अशा या पुरस्कारासाठी शैक्षणिक, सामाजिक, सांस्कृतिक, राजकीय, कृषी, विज्ञान, तंत्रज्ञान, उद्योग, सहकार, पर्यावरण, कला इत्यादी विविध क्षेत्रात उल्लेखनीय कार्य करणाऱ्या व्यक्तींची जीवनसाधना गौरव पुरस्कारासाठी निवड करण्यात येते,अशी माहिती कुलगुरू प्रा. डॉ. सुरेश गोसावी आणि प्र-कुलगुरूप्रा. डॉ. पराग काळकर यांनी कळवली आहे.
