आरटीई प्रवेशाची तिसरी प्रतीक्षा यादी जाहीर
अजूनही अनेक विद्यार्थ्यांनी आरटीई प्रवेशाकडे पाठ फिरवल्याचे दिसून येत आहे.
eduvarta@gmail.com 
एज्युवार्ता न्यूज नेटवर्क
शैक्षणिक वर्ष 2025-26 साठी आरटीई कायद्याअंतर्गत सुरू असलेल्या ऑनलाइन प्रवेश प्रक्रियेत (RTE Admission) आणखी एक महत्त्वपूर्ण टप्पा पार पडला आहे. तिसरी प्रतीक्षा यादी जाहीर (Third waiting list announced) झाली असून त्यामध्ये एकूण २ हजार ४८२ विद्यार्थ्यांची निवड झाली आहे. यादी प्रसिद्ध झाल्यानंतर लगेचच प्रवेश प्रक्रिया सुरू करण्यात आली आहे.
आरटीई प्रवेश प्रक्रियेस सुरुवात झाल्यापासून १ लाख ४० हजार ४०४ विद्यार्थ्यांची निवड करण्यात आली. त्यापैकी नियमित निवड यादीसह प्रतिक्षा यादी मिळून एकूण ८६ हजार ५४८ विद्यार्थ्यांनी आपला प्रवेश निश्चित केला आहे. मात्र, अजूनही अनेक विद्यार्थ्यांनी आरटीई प्रवेशाकडे पाठ फिरवल्याचे दिसून येत आहे.
दरम्यान, दुसऱ्या प्रतीक्षा यादीतील प्रवेशाची मुदत संपल्यानंतर तिसरी प्रतीक्षा यादी जाहीर झाली आहे. अजूनही प्रवेशासाठी जागा उपलब्ध असल्याने या यादीनंतर चौथी प्रतीक्षा यादी जाहीर होणार आहे. त्यामुळे त्यांचा प्रवेश अजूनही झाला नाही, अशा पालकांनी आरटीईच्या अधिकृत वेबसाईटवर अद्ययावत माहिती तपासावी. त्यात जर आपल्या पाल्याचे नाव आल्यास संबंधित शाळेत दिलेल्या वेळेत प्रवेश घ्यावा, असे आवाहन देखील शिक्षण विभागामार्फत करण्यात आले आहे.
