मोठी बातमी: विद्यापीठाची पीएचडी प्रवेश पूर्व परीक्षा पुढे ढकलली

एज्युवार्ता न्यूज नेटवर्क 

Sppu News: बदलापूर(Badlapur)घटनेच्या पार्श्वभूमीवर विरोधी पक्षांनी 24 ऑगस्ट महाराष्ट्र बंदची हाक दिली आहे. मात्र, त्याच दिवशी सावित्रीबाई फुले पुणे विद्यापीठाच्या (Savitribai fule Pune University) पीएचडी प्रवेशासाठी (पेट) (PhD admission PET exam)पीएचडी प्रवेश पूर्व परीक्षा घेतले जाणार आहे. परीक्षा केंद्रावर पोहोचताना किंवा परीक्षा देताना विद्यार्थ्यांना अडचणी निर्माण होऊ नयेत, या उद्देशाने पुणे विद्यापीठाने पेट परीक्षा पुढे (Pune University pet exam postpone)ढकलण्याचा निर्णय घेतला आहे. पीएचडी प्रवेश पूर्व परीक्षा 24 ऑगस्ट ऐवजी आता 31 ऑगस्ट रोजी घेतली जाणार आहे.

बदलापूर येथील एका नामांकित शाळेतील दोन लहान  विद्यार्थिनींवर लैंगिक अत्याचार झाल्याची घटना समोर आली. त्यामुळे बदलापूर येथील संतप्त नागरिकांनी रस्त्यावर उतरून या घटनेवर संतप्त भावना व्यक्त केल्या. शाळेतही मुली सुरक्षित नसतील तर मुलींनी कुठे जायचे ?असा सवाल उपस्थित करत विरोधी पक्षांनी शासनाला धारेवर धरले. तसेच 24 ऑगस्ट रोजी महाराष्ट्र बंदची हाक दिली आहे. 

सावित्रीबाई फुले पुणे विद्यापीठातर्फे पुणे ,अहमदनगर व नाशिक या तीन जिल्ह्यांमध्ये विविध परीक्षा केंद्रांवर पेट परीक्षेचे आयोजन करण्यात आले आहे. 24 जून रोजी होणाऱ्या परीक्षेची सर्व तयारी विद्यापीठातर्फे पूर्ण करण्यात आली आहे.सर्व विद्यार्थ्यांना 19 ऑगस्ट पासूनच परीक्षेसाठीचे हॉल तिकीट डाउनलोड करण्यासाठी उपलब्ध करून दिले आहेत. पीएचडी प्रवेश पूर्व परीक्षेसाठी सुमारे 10 हजार 600 विद्यार्थ्यांनी नोंदणी केलेली आहे.

परीक्षा केंद्र चालकांनी विद्यापीठाच्या पेट परीक्षेस मनुष्यबळ उपलब्ध करून देण्यास असमर्थता दर्शवली होती. विद्यापीठाने परीक्षेसाठी स्वतःचे मनुष्यबळ उपलब्ध करून द्यावे, असे परीक्षा केंद्र चालकांनी सांगितले होते. त्यामुळे परीक्षा घेणे अवघड झाले होते.त्यातच महाराष्ट्र बंद मुळे विद्यार्थ्यांना परीक्षा केंद्रावर पोहोचण्यास अडचणी येऊ शकतात.तसेच परीक्षा घेतली तर महाराष्ट्र बंदमुळे काही विद्यार्थी परीक्षेपासून वंचित राहू शकतात.परिणामी विद्यापीठाला पुन्हा परीक्षा घ्यावी लागू शकते. त्यामूळे विद्यापीठ प्रशासनाने 24 ऑगस्ट रोजीची पेट परीक्षा पुढे ढकलण्याचा निर्णय घेतला आहे. त्यामुळे ही परीक्षा आता 31 ऑगस्ट रोजी होईल,असे विद्यापीठातील अधिकाऱ्यांनी सांगितले.