विद्यापीठाच्या हातून कन्व्हेन्शन सेंटर गेले; पूनावाला यांनीच कळवला नकार 

एज्युवार्ता न्यूज नेटवर्क 

सावित्रीबाई फुले पुणे विद्यापीठात (Savitribai phule Pune University)प्रस्तावित कन्व्हेन्शन सेंटरला (convention centre)विद्यापीठाच्या व्यवस्थापन परिषद सदस्यांसह विविध संघटनांकडून झालेल्या विरोधानंतर प्रसिद्ध उद्योगपती पूनावाला (punawala) यांनीच या प्रकल्पातून अंग काढून घेतले आहे. त्यामुळे विद्यापीठाच्या हातून तब्बल 200 कोटी रुपयांचे कन्व्हेन्शन सेंटर गेले आहे. या प्रकल्पामुळे पर्यावरणावर परिणाम होण्याची शक्यता असल्याने पुनावाला यांच्याकडून हा प्रकल्प पुढे घेऊन जाण्यात आम्हाला रस नसल्याचे कळविण्यात आले आहे.

पुणे विद्यापीठाच्या आवारात डॉ. बाबासाहेब आंबेडकर यांच्या पुतळ्याच्या मागच्या बाजूला सुमारे आठ ते नऊ एकर परिसरात भव्य दिव्य असे कन्व्हेन्शन सेंटर उभारण्याची तयारी प्रसिद्ध उद्योगपती पुनावाला यांनी दर्शवली होती. विद्यापीठाला त्याचा फायदाच होणार होता. परंतु, या जागेवरील झाडे तोडावी लागणार असल्याने येथील पर्यावरणावर त्याचा परिणाम होईल, या भूमिकेतून विविध राजकीय व सामाजिक संघटनांनी त्यास विरोध दर्शविला होता. तसेच विद्यापीठात आंदोलने ही केली होती. त्याचप्रमाणे विद्यापीठाच्या काही व्यवस्थापन परिषद सदस्यांनी सुद्धा या प्रकल्पाला उघडपणे विरोध दर्शविला होता. गेल्या काही दिवसांपासून या प्रकल्पासंदर्भातील विविध बातम्या प्रसारमाध्यमांमध्ये प्रसिद्ध होत होत्या. या पार्श्वभूमीवर पुनावाला यांनी या प्रकल्पात रस नसल्याचे कळविले आहे.

गेल्या काही दिवसांपूर्वी विद्यापीठातील कुलसचिव पदावरून मोठा वादंग निर्माण झाला होता. त्या घटनेचा आणि कन्व्हेन्शन सेंटरचा संबंध लावला जात होता. परंतु, सर्वच घटकांकडून या प्रकल्पाला विरोध होत असल्याने पुनावाला यांनीच या प्रकल्पात रस नसल्याचे कळवल्याने कन्व्हेन्शन सेंटरच्या चर्चेला पूर्णविराम मिळाला आहे.