ILS कॉलेज प्रशासनावर गंभीर आरोप; न्यायालयाचे चौकशीचे आदेश

एज्युवार्ता न्यूज नेटवर्क 

देशभर लौकिक असलेल्या प्रतिष्ठित आयएलएस काॅलेजमध्ये (ILS College Pune) जातीयवाद, गुंडगिरी, पक्षपात, लैंगिक छळ आणि रॅगिंग (Sexual Harassment and Ragging) केले जात असल्याचा आरोप काही विद्यार्थ्यांनी मुख्य  न्या. देवेंद्र कुमार उपाध्याय यांच्याकडे पत्राद्वारे केला. या पत्राची गंभीर दखल घेत मुंबई उच्च न्यायालयाच्या (Bombay High Court) निबंधकांनी याची तातडीने (न्यायिक) चौकशी (Judicial inquiry) करण्याचे आदेश राज्य सरकारला दिले आहेत. 

'आएलएस'च्या ११८ हून अधिक आजी आणि माजी विद्यार्थ्यांनी याबाबत पत्र लिहिले आहे. या पत्रात संस्थात्मक जातीयवाद, रॅगिंग,  लैंगिक छळ, गुंडगिरी, पक्षपात आणि अल्पसंख्याक विद्यार्थ्यांना वाईट वागणूक, असे आरोप करण्यात आले आहेत. या घटनांची चौकशी करण्याची मागणी पत्राद्वारे करण्यात आली होती. या प्रकरणाची गंभीर दखल घेत मुंबई उच्च न्यायालयाच्या निबंधकांनी विद्यार्थ्यांनी केलेल्या तक्रारी कायद्यानुसार विचारात घेतल्या जाव्यात, असे म्हटले आहे. सरकारने केलेल्या कारवाईची माहिती लवकर द्यावी, असे पत्र राज्याच्या उच्च शिक्षण संचालनालक कार्यालयाला पाठवले आहे. 

आयएलएस महाविद्यालय सावित्रीबाई फुले विद्यापीठाशी संलग्न असल्याने कुलगुरूंकडे दाद मागितली. मात्र, विद्यापीठ प्रशासनाने अलिप्त राहणे स्वीकारले. त्यात काहीही कारवाई केली नाही. त्यामुळे उच्च न्यायालयात येणे, हा शेवटचा पर्याय होता, असे विद्यार्थ्यांनी आपल्या पत्रात नमूद केले आहे.

एका विशिष्ट समाजातील विद्यार्थ्यांना विविध पदांवर नियुक्ती दिली जात असल्याने त्यांना 'प्राधान्य वागणूक' मिळत आहे. महाविद्यालयात गेल्या तीन वर्षांपासून कॉलेज विद्यार्थ्यांना 'फुले-आंबेडकर स्मृती व्याख्यान' आयोजित करण्यास मनाई करत असल्याचा आरोपही या पत्रात करण्यात आला.  ब्राह्मणेतर विद्यार्थ्यांना त्यांची गुणवत्ता असूनही, अनेकदा क्षुल्लक कारणांसाठी विविध अडचणींचा सामना करावा लागतो, असाही आरोप या पत्रात करण्यात आला आहे.