युवा पिढीला काय हवे आहे? संशोधनातून समोर आले धक्कादायक वास्तव

एज्युवार्ता न्यूज नेटवर्क

२१ वे शतक हे तंत्रज्ञानाचे (Technology) आहे, विकासाचे आहे अशी वाक्य नेहमीची झाली आहेत. पण प्रत्यक्षात मात्र आजही युवा (youth) पिढी पायाभूत सुविधा आणि शिक्षणाची (Education) मागणी करत असल्याचे धक्कादायक चित्र समोर आले आहे. नुकत्याच करण्यात आलेल्या एका जागतिक सर्वेक्षणातून (Survey) असे दिसून आले आहे की, आजच्या तरुण पिढीला रोजगाराभिमुख शिक्षण, चांगली नोकरी, सुरक्षित वातावरण हवे आहे. निराशेची बाब म्हणजे अजूनही काही युवा वर्ग पिण्यासाठी शुद्ध पाणी, चांगले रस्ते आणि मुली सॅनिटरी पॅड पासून वंचित आहेत.

''द पार्टनरशिप फॉर मॅटर्नल, न्यूबॉर्न अँड चाईल्ड हेल्थ' PMNCH ने जागतिक आरोग्य संघटनेसोबत मिळून जागतिक युवा दिनाचे औचित्य साधत जागतिक स्तरावर "तरुणांना काय हवे आहे" या विषयावर एक सर्वेक्षण केले. या सर्वेक्षणात जगभरातून १० ते २४ वयोगटातील १ दशलक्ष पेक्षा अधिक युवकांचे म्हणणे ऐकले आहे. या सर्वेक्षणात भारतासह आफ्रिका, आशिया आणि लॅटिन अमेरिकेतील  नायजेरिया, युगांडा, झांबिया, मलावी, घाना, इंडोनेशिया, ब्राझील यासह २० हून अधिक देशांमधील युवांशी संपर्क केला.

शिक्षक चौदा दिवस महाराष्ट्र पिंजून काढणार; निरक्षरांना शोधण्याची जबाबदारी

सर्वेक्षणात भाग घेतलेल्या तरुणांपैकी ४०.५ टक्के तरुणांनी चांगले शिक्षण, कौशल्य आणि रोजगाराभिमुख शिक्षण, शिक्षणातून सक्षमता, स्थिर नोकरी याची अपेक्षा करतात. तर १५ ते १९  वयोगटातील किशोरवयीन युवक युवती आर्थिक - भौतिक सुरक्षा आणि स्वातंत्र्य याची अपेक्षा करतात. या वयोगटातील मुलींनी शिकण्याची संधी आणि गुणवत्तापूर्ण शिक्षण मिळावे, अशी मागणी केली आहे.

सर्वेक्षणात १५ ते १९ वयोगटातील किशोरवयीन मुला मुलींची संख्या ४७.२ टक्के इतकी आहे. यामध्ये २५.७ टक्के मुली आणि २१.८ टक्के मुलगे आहेत. किशोरवयीन मुलांनी स्वच्छ पाणी आणि चांगल्या रस्त्यांची अपेक्षा केली आहे तर मुलींनी मोफत सॅनिटरी पॅड मिळावेत, अशी अपेक्षा केली आहे.

सर्वेक्षणात सर्वाधिक युवक भारतातील

सर्वेक्षणात भारतातुन सर्वाधिक १७.२ टक्के युवक सहभागी झाले होते. त्यानंतर युगांडा या देशातील १२.० टक्के आणि त्यानंतर इंडोनेशिया १०.२ टक्के  आणि झांबिया ८.४ टक्के युवक सर्वेक्षणात सहभागी झाले होते.