MPSC गट-क सेवा संयुक्त पूर्व परीक्षेसाठी अर्ज भरण्यास मुदतवाढ; १० ऑगस्टपर्यंत करता येणार अर्ज
महाराष्ट्र लोकसेवा आयोगाने (एमपीएससी) महाराष्ट्र गट-क सेवा संयुक्त पूर्व परीक्षा-२०२६ साठी अर्ज सादर करण्याच्या अंतिम मुदतीत वाढ जाहीर केली आहे. उमेदवारांच्या मागणीचा विचार करून अर्ज भरण्याची अंतिम मुदत १० ऑगस्ट २०२६ रोजी रात्री ११.५९ वाजेपर्यंत वाढविण्यात आली आहे.
Eduvarta
एज्युवार्ता न्यूज नेटवर्क
महाराष्ट्र लोकसेवाआयोगाने (MPSC Maharashtra Public Service Commission) महाराष्ट्र गट-क सेवा संयुक्त पूर्व परीक्षा (Joint Prelims Examination) -२०२६ साठी अर्ज सादर करण्याच्या अंतिम मुदतीत वाढ जाहीर केली आहे. उमेदवारांच्या मागणीचा विचार करून अर्ज भरण्याची अंतिम मुदत (Application deadline) १० ऑगस्ट २०२६ (August 10,2026) रोजी रात्री ११.५९ वाजेपर्यंत वाढविण्यात आली आहे. ऑनलाइन परीक्षा शुल्क भरण्याची अंतिम मुदत १३ ऑगस्ट २०२६ रोजी रात्री ११.५९ वाजेपर्यंत निश्चित करण्यात आली आहे. या परीक्षेद्वारे एकूण ५,७०७ पदांसाठी भरती प्रक्रिया राबविण्यात येत आहे. पूर्वी प्रसिद्ध झालेल्या शुद्धीपत्रकानुसार विविध मागण्यांचा समावेश करून पदसंख्या वाढविण्यात आली आहे.
यापूर्वी अर्ज सादर केलेल्या उमेदवारांना नव्याने अर्ज करण्याची गरज नाही. त्यांनी ‘My Account’ पर्यायातून संबंधित माहिती अद्ययावत करावी, असे आयोगाने स्पष्ट केले आहे. आवश्यक कागदपत्रांची पडताळणी नियुक्तीपूर्वी करण्यात येईल. पात्रता सिद्ध न झाल्यास उमेदवार नियुक्तीस अपात्र ठरेल. याबाबतचे शुद्धीपत्रक महाराष्ट्र लोकसेवा आयोगाच्या अधिकृत संकेतस्थळावर उपलब्ध आहे.
दरम्यान, मुंबई नगरपाल कार्यालयातील बेलिफ-लिपिक, गट-क स्पर्धा परीक्षा २०२६ रविवार, ६ सप्टेंबर २०२६ रोजी आयोजित करण्यात येणार आहे. ही परीक्षा अमरावती, छत्रपती संभाजीनगर, नागपूर, नाशिक, नवी मुंबई आणि पुणे या जिल्हा केंद्रांवर घेण्यात येईल. पेपर एक सकाळी ११ ते दुपारी १२ वाजेपर्यंत तर पेपर दोन दुपारी ३ ते ४ वाजेपर्यंत होणार आहे. अभ्यासक्रम आणि निवड प्रक्रियेचा तपशील आयोगाच्या संकेतस्थळावर प्रसिद्ध केल्याप्रमाणेच राहील.
अर्ज केलेल्या उमेदवारांना स्थायी किंवा कायमस्वरूपी निवासाच्या तपशीलानुसार जिल्हा केंद्र उपलब्ध करून दिले जाईल. परीक्षेच्या सात दिवस आधी प्रवेश प्रमाणपत्र ऑनलाइन अर्ज प्रणालीतील उमेदवारांच्या प्रोफाइलमध्ये उपलब्ध होईल. १५ जून २०२६ रोजी प्रसिद्ध झालेल्या मूळ जाहिरातीतील व ३० जून २०२६ रोजी जारी केलेल्या शुद्धीपत्रकातील इतर अटी व शर्तींमध्ये कोणताही बदल करण्यात आलेला नाही, असे आयोगाने स्पष्ट केले आहे.
उमेदवारांनी अधिकृत संकेतस्थळावरून शुद्धीपत्रक तपासून अर्ज प्रक्रिया वेळेत पूर्ण करावी. मुदतवाढीमुळे अनेक उमेदवारांना अर्ज करण्याची संधी मिळाली आहे. आयोगाने सर्व पात्र उमेदवारांना वेळेत अर्ज भरण्याचे आवाहन केले आहे.
